Tơring Xín Mần, kong pơlê Hà Giang troh nôkố hiăng pêi klêi lối 80% tơdroăng pơkâ ‘na tŏng kum bro hngêi ối ăm rơpŏng hdroâng kuăn ngo, peăng kong ngo. Ôh ti xê to tiah mê, kong pơlê kố ối pêi pro krâu kơhnâ tung tí tăng túa pơkâ tŏng kum tơdroăng cheăng kâ ăm vâi krâ nhŏng o mơnhông cheăng kâ. Khu kăn pơkuâ hiăng hâi măng tí tăng khu tơrŭm, mơdêk ki dâi lĕm, plâi kơtóu hên dêi mâu hdrê loăng pêt.

Mâu rôh hôp tơpui tơno châ tơkŭm po đi đo. Mâu kăn ƀô̆ môi tiah Ngế xiâm pơkuâ Ƀơrô ngăn cheăng pêi Mố đô̆i tro rong rêh ối pơlê pơla tơring Xín Mần Đặng Thu Giang athế pơchuât túa pơkâ pêi pro, tơdroăng ki ‘no liăn ƀă tơhrâ môi măng tĭng môi hdroh.

“Tơring pêi pro kơtăng khât. Mâu cheăm athế rak vế ƀă ai mơ-éa tơbleăng, athế ai tơdroăng tơhrâ, túa pơkâ pôu râng hnoăng cheăng dêi ngế ki ối a ko pôu râng dêi hnoăng cheăng tung tâi tâng mâu tơdroăng pêi pro Tơdroăng pơkâ tơnêi têa. Tung mê, hlo nhên hnoăng cheăng dêi tơná tung pơla pêi, tâng tơmiât ôh tá rak tơniăn mâu pơkâ mê athế xo dêi kơlo tơná mơnhên tối a mơ’nui hơnăm xuân môi tiah ai pơkâ mơ’no ‘na hnoăng cheăng kăn ƀô̆”.

Ing tơdroăng ki ai khât séa ngăn 3 tơdroăng pơkâ dêi tơnêi têa a mâu tơring cheăm, kăn phŏ hnê ngăn Hô̆i đong Hdroâng kuăn ngo dêi Kuô̆k hô̆i Trần Thị Hoa Ry tối tơdroăng ki chiâng tơdjâk troh cheăm tơring pêi pro tro la xuân ai mâu cheăm tơring ki ‘nâ ôh tá pêi pro.

“Mâu cheăm tơring ki lâi châ khu râ Đảng, khu kăn pơkuâ tơmâng ngăn mê hnê mơhno ó rơdêi khât, xing xoăng kăn ƀô̆ ai tŭm ivá. Vâ ing mê xing xoăng kăn ƀô̆ pêi pro châ mâu tơdroăng ki ai tŭm ivá tiah mê, mê cho tung mâu hnoăng cheăng hnê mơhno, pơkuâ, tơrŭm tơtro ƀă tí tăng ‘nâi plĕng mâu hlá mơ-éa pơkâ ối tung hnoăng pơkuâ ing hdrối.

Á hlo vâi ôh ti xê tơkôm troh mâu tơdroăng xơpá, tơvâ tơvân nếo tŏng kum mê sap ing râ kơpêng hiăng ai tơdroăng ki hbrâ rơnáu mơjiâng tôh pêi hnoăng cheăng thăm nếo râng kŏng mơhno tơdroăng cheăng ăm kăn ƀô̆ a tơring cheăm”.

Vêh ƀă tơdroăng dêi tơring kơtiê kơpong kong ngo hmốu Xín Mần, Hà Giang. Tơdroăng mơdêk hnoăng cheăng dêi tâi tâng, tơmiât rơkê dêi kuăn pơlê, tơdroăng ki djâ troăng ahdrối dêi kăn ƀô̆, đảng viên ƀă tơdroăng ki veăng kum dêi khu pơkuâ tơdroăng kal kí cho tơdroăng ki kal vâ pơkâ tơƀrê mâu tơdroăng pơkâ dêi tơnêi têa.

Tiô Kăn hnê ngăn Vi ƀan kong pơlê Hà Giang Nguyễn Văn Sơn, kố cho tơdroăng vâ Hà Giang cho môi tung pái kong pơlê dêi tơnêi têa djâ troăng ahdrối pâ pêi pro troăng hơlâ pơkâ pro xoăng râ, xoăng hnoăng:

“Kong pơlê ôh ti chiâng pêi teăng ăm tơring, tơring ôh ti chiâng pêi teăng ăm cheăm, tơnêi têa ôh ti chiâng pêi teăng ăm kong pơlê. Xua a kong pơlê nôkố xuân xâu ôh tá tro, ai drêng ‘nâ ối pêi bô bối, mê nhŏng o a tơring xuân xâu pêi ôh tá tro xuân pêi bô bối mê pơcháu ăm cheăm xuân pêi môi tiah mê.

Laga mơjiâng troăng hơlâ tŏng kum sap ing Kuô̆k hô̆i, troh Chin phuh pêi pro nhên tâi tâng mâu tơdroăng, klâ xoăng kơpong. Drêng mê, kăn ƀô̆ pêi ôh tá xâu ôh tá tro xếo mê kăn ƀô̆ kô hbrâ rơnáu vâ pêi pro”.

Mơdêk xoăng râ, diâp tơdroăng tơngah. Kong pơlê kô hbrâ rơnáu khên pêi, khên pơ’lêh, khên pôu râng hnoăng cheăng vâ pêi klêi 3 tơdroăng pơkâ dêi tơnêi têa. Mê cho tối rơdêi dêi kăn phŏ pơkuâ Khu pơkâ ƀă ‘no liăn cheăng kong pơlê Quảng Bình Mai Hồng Ngọc ai tối:

“Laga, tơdroăng ki pơkâ tíu xoăng râ ăm râ tơring xuân kal tơtrŏng, thăm mơdêk séa ngăn dêi kơ koan pơkuâ xing xoăng mâu tơdroăng vâ teăm tŏng kum, hnê mơhno mâu tơring, cheăm, ngế ki ‘no liăn ing rôh ki cheh bro, kĭ, pơcháu túa pơkâ kơxô̆ liăn vâ tơdroăng tơbleăng pêi pro xuân môi tiah pêi pro ăm xúa, mơdrếo liăn ăm mâu tơdroăng tơkêa”.

Ƀă hiâm mơno hbrâ rơnáu, “séa ngăn”athế “tro”, tơdrăng, pôi tá ví, teăm châ hlo mâu tơdroăng xơpá, tơvâ tơvân, Kuô̆k hô̆i pơtối rơtế ƀă Chin phuh vâ tăng hlo mâu troăng hơlâ pơkâ tơtro tâ, malối cho tung pơla pêi pro 3 Tơdroăng pơkâ tơnêi têa pơla hơnăm 2021 – 2025 bu ối péa hơnăm ‘nôi athế klêi. Hâi lơ 29 khế 11 hơnăm 2023, Hneăng hôp má 6 Kuô̆k hô̆i hneăng 15 hiăng tơbleăng Pơkâ ki kal ‘na tơdroăng kố.

Kố cho rôh apoăng môi tơdroăng kal ‘na séa ngăn dêi Kuô̆k hô̆i châ pêi a tơdế hneăng, “kế tơmeăm pêi pro ki kal” tro ƀă tơdroăng tơbleăng. Rôh apoăng, môi tơdroăng séa ngăn khât tơkŭm 3 tơdroăng pơkâ dêi tơnêi têa ki kal. Séa ngăn ƀă hiâm mơno tơdrăng cho mơjiâng ƀă tơtrâ, tung mê, mơjiâng xuân cho hiăng pro mâu tơdroăng rế hía rế tro tâ. Kăn xiâm hnê ngăn Kuô̆k hô̆i Vương Đình Huệ hiăng tối nhên tiah mê tung hên rôh hôp ƀă ăm ‘nâi:

“Kuô̆k hô̆i môi tuăn vâ Chin phuh rĕng mơjiâng, pơtroh ăm Kuô̆k hô̆i a hneăng hôp ki a chê má môi Kơxop hlá mơ-éa Pơkâ ‘na pêi pro mâu troăng hơlâ tŏng kum, troăng hơlâ pơkâ xiâm ƀă tơdroăng ki xoăng râ ăm râ tơring pơkâ inâi,pơkâ, xing xoăng xúa kơxô̆ liăn tơnêi têa tung tơbleăng pêi pro mâu tơdroăng pơkâ dêi tơnêi têa”.

Hên kăn Kuô̆k hô̆i tơngah, tơdroăng pơkâ dêi Kuô̆k hô̆i kô tŏng kum mâu tơdroăng ki ôh tá tơ’lêi hlâu tung pơla tơbleăng 3 tơdroăng pơkâ dêi tơnêi têa. Rơ Châm H’Phik, ngế ki lo ing Gia Lai tối:

“Pơkâ rĕng pêi pro ƀă teăm tơdrêng, tơtro khât ƀă hiâm mơno kuăn pơlê, nôkố hiăng tŏng kum mâu tơdroăng ki xiâm dế trâm pá tung pơla tơbleăng 3 Tơdroăng pơkâ dêi tơnêi têa”.

Rơtế ƀă tơdroăng ki tơbleăng Pơkâ séa ngăn ‘na ‘Tơdroăng tơbleăng pêi pro mâu pơkâ dêi Kuô̆k hô̆i ‘na mâu Tơdroăng pơkâ dêi tơnêi têa ‘na mơjiâng thôn pơlê nếo pơla hơnăm 2021 – 2025; kơdroh kơtiê krá ton pơla hơnăm 2201 – 2025; mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo pơla hơnăm 2201 – 2030”, Kuô̆k hô̆i xuân hiăng pơcháu ăm Chin phuh pơtroh ăm Kuô̆k hô̆i tung hneăng hôp rôh ki achê má môi Pơkâ ki xiâm ‘na xoăng râ, xoăng hnoăng pơkuâ, pơkâ thế, kơdroh chêh bro hlá mơ-éa vâ teăm tŏng kum xơpá, tơvâ tơvân, kum tơdroăng tơbleăng mâu Tơdroăng pơkâ tơnêi têa châ tơƀrê, pêi klêi khế hơnăm pơkâ, pro tơdroăng ki tơngah ƀă tơdroăng rêh ối hơniâp ro dêi kuăn pơlê.