Ngin troh a tơring Lâm Hà klăng a rôh kuăn pơlê hdroâng kuăn ngo a tíu kố dế hơniâp ro Hâi mơdĭng tơrŭm tâi tâng kuăn pơlê – koh hâk Tơring pêi klêi thôn pơlê nếo. Triăng drôu xiâm “Dà Mpao”, pôa Kră Ja Nhang – Krâ pơlê thôn Dà Mpao, cheăm Dă Dờn, tơring Lâm Hà hâk tơngăm tơbleăng: mê cho drôu ki châ mơnhên OCOP dêi cheăm, châ mơ’no tơbleăng a hâi mơdĭng. Krâ pơlê tối inâi drôu xiâm “Dà Mpao” cho nâl K’Ho, la tơplôu nâl xuăn cho “Suối Mơ”.

“Mâu kuăn pơlê veăng tung Hâi mơdĭng tơrŭm tâi tâng kuăn pơlê hơniâp ro, Đảng, tơnêi têa to ton tơkŭm po hâi mơdĭng tơrŭm mâu hdroâng kuăn ngo môi tiah kố, tâi tâng rêm ngế rơtế ƀă dêi rơpó veăng tung mâu tơdroăng ki po tung hâi mơdĭng kố gá hơniâp ro khât. Kuăn pơlê rơtế ƀă dêi rơpó veăng kum hâi pêi cheăng, veăng kum dêi kế tơmeăm, pleăng tơnêi vâ mơnhông pơlê cheăm môi tiah: pro troăng, mơgrúa lĕm thôn pơlê, krúa, cheăng kâ rế hía tơtêk''.

Vâi krâ nhŏng o xuân rak vế khôi túa lĕm tro hdroâng kuăn ngo akố, tung mê ai tŏn chêng koăng, tê̆n ếo pơtâk ƀă hên ki ê. ‘Na mơnhông cheăng kâ mê rêm ngế ‘no liăn păn roăng, í peâp, pêt kơphế, pêi klâng. Kơnôm tiah mê, tơdroăng rêh ối kuăn pơlê rế hía rế mơnhông”.

Troăng prôk mot tung cheăm sap ing pơlê kân Đinh Văn troh a mâu cheăm châ po rơdâ, tơkâ luâ hên deăng pêt kơphế ki drêh ngiât lĕm pêt tơvât plâi sầu riêng ƀă mâu plâi kâ ki ê. Troh a môi kơpong kuăn pơlê rêh ối, ai hên toăng hngêi ki lĕm krip, kuăn pơlê dế mơgrúa dêi mâu ‘noăng reăng ki bro mơnâ mâ ngăn drô 2 pâ troăng ƀă mơgrúa lĕm kong prâi tơnêi tơníu tơdah hơnăm nếo. Pôa K’Brối, kăn hnê ngăn Vi ƀan Măt trâ̆n Tơnêi têa Việt Nam cheăm Liên Hà tơbleăng: “Liên Hà” cho inâi dêi môi to cheăm a tơring Đan Phượng, pơlê kong kân Hà Nội, drêng vâi krâ nhŏng o mot a Lâm Đồng mơjiâng cheăng kâ nếo.

Lâp cheăm ai lối 2 rơpâu rơpŏng kuăn pơlê ƀă dâng 9 rơpâu pơ’leăng mâ mơngế. Klêi kơ’nâi châ mơnhên “Cheăm pêi klêi thôn pơlê nếo” sap ing hơnăm 2019, tâi tâng kuăn pơlê pơtối mơ-eăm vâ mơjiâng pêi klêi thôn pơlê nếo mơdêk.

“Klêi kơ’nâi cheăm Liên Hà châ mơnhên cho cheăm thôn pơlê nếo mê ai tơdroăng Pơkâ ‘na tơdroăng ki pơkâ thế pơla Vi ƀan hnê ngăn cheăm ƀă Vi ƀan Măt trâ̆n tơnêi têa, pơtối mơdêk hiâm mơno tơrŭm mơ-eăm pêi klêi mâu tơdroăng pơkâ châ hên tâ dêi tơdroăng pơkâ thôn pơlê nếo. Rêm hơnăm, Măt trâ̆n tơnêi têa mơhnhôk mâu khu tơrŭm cheăng, malối, cho mâu krâ pơlê, ngế ki pơkuâ pơlê hdroâng kuăn ngo, tơdjuôm ivá môi hiâm mơno mơdêk khât mâu tơdroăng pơkâ mơjiâng thôn pơlê nếo a mâu thôn pơlê, tơmiât troh tơdroăng mơjiâng cheăm thôn pơlê nếo mơdêk”.

Tiô tối tơbleăng dêi Vi ƀan hnê ngăn tơring Lâm Hà, kong pơlê Lâm Đồng, luâ 35 hơnăm mơjiâng, mơnhông ƀă 10 hơnăm tơbleăng pêi pro Tơdroăng pơkâ tơnêi têa mơjiâng thôn pơlê nếo, tơring Lâm Hà hiăng rế hía rế hơ’lêh mơnhông tung tâi tâng, châ ki têi ‘na cheăng kâ rêm hơnăm dêi Lâm Hà châ 7,6% tung hơnăm. Krê hơnăm 2022 kố nah, ki têi ‘na mơdêk cheăng kâ Lâm Hà châ dâng 8,5%, pêi lo liăn rêm ngế châ vâ chê 57 rơtuh liăn.

Mâu hơnăm hdrối nah, tâi tâng kơxô̆ liăn mơhnhôk mơjiâng thôn pơlê nếo a tơring châ lối 5.300 rơtal liăn. Troh nôkố, hngêi trăng, troăng prôk châ tơmâng bro tơdâng tơ’mô, tiô pơkâ.

Ƀă mâu tơdroăng ki pêi pro klêi, hâi lơ 12/7/2022, Ngế pro xiâm hnê ngăn Chin phuh hiăng pơkâ tơdroăng mơnhên tơring Lâm Hà, kong pơlê Lâm Đồng pêi klêi tơring thôn pơlê nếo. Hâi lơ 19/10/2022, kăn xiâm hnê ngăn tơnêi têa pơkâ tơdroăng ki diâp Mê dái pêi cheăng ối má Pái ăm Đảng ƀô̆, Khu kăn pơkuâ ƀă Kuăn pơlê tơring Lâm Hà hiăng kơhnâ rơkê tung tơdroăng tơ’noăng “Lâp tơnêi têa tơdjuôm ivá mơjiâng thôn pơlê nếo”. Pôa K’Tân, kăn phŏ hnê ngăn Vi ƀan Măt trâ̆n tơnêi têa Việt Nam tơring Lâm Hà, kong pơlê Lâm Đồng tối nhên, châ tơdroăng kố, pakĭng tơdroăng ki tơmâng ngăn dêi Đảng ƀă Tơnêi têa, mơhno ivá tơrŭm rơdêi dêi mâu kuăn pơlê hdroâng kuăn ngo a tơring.

“Măt trâ̆n Tơnêi têa Việt Nam tơring Lâm Hà ai hnoăng cheăng séa ngăn mâu tơdroăng cheăng, tơrŭm tơkŭm mâu rơxông kuăn pơlê. Drêng klăng 35 hơnăm mơjiâng tơring Lâm Hà, nếo a chê kố tơring tơkŭm po leh tơbleăng mơnhên tơring thôn pơlê nếo. Mâu rơxông kuăn pơlê mâu hdroâng kuăn ngo a tơring phiu ro khât. Tung mê ai tơdroăng veăng kum kân dêi Măt trâ̆n rêm râ, tiô rêm tơdroăng pơkâ. Krê Vi ƀan Măt trâ̆n Tơnêi têa ai 10 tơdroăng pơkâ, 10 tơdroăng pêi klêi vâ séa ngăn mơnhên thôn pơlê nếo, thôn pơlê rơkê, thôn pơlê tiô túa nếo, ƀă ai tá tơdroăng ki tŏng kum tơdroăng rêh ối ăm kuăn pơlê.

Hơnăm nếo 2023 hiăng troh, kuăn pơlê hdroâng kuăn ngo tơring Lâm Hà, kong pơlê Lâm Đồng ai tơ’nôm hên tơdroăng ki phiu ro nếo. Mê cho ivá vâ Đảng ƀô̆, Khu kăn pơkuâ ƀă Kuăn pơlê mâu hdroâng kuăn ngo tung tơring pơtối mơdêk khôi hmâ tơrŭm, tơdjuôm ivá, tơdjuôm hiâm mơno, mơ-eăm mơjiâng tơring Lâm Hà rế hía rế kro mơdrŏng.