Sap ing kơxo má, mâu khu cheăng hiăng tơkŭm mơgrúa kong prâi, kui trâp tơnêi, pro phuâng lĕm troăng thôn, tŏng gum pơto tơmeăm kâ ăm mâu rơpŏng ki tá hâi chiâng vâ prôk lăm a dêi pó; gum kuăn pơlê rơnêu mâu tơmeăm kuăn pơlê rêh ối tơ’nhê, pro lĕm hngêi trăng, chôa ‘lâng tơniăn tơdroăng rêh ối klêi kơ’nâi têa kân lân lu.

Troh nôkố, péa tíu ki kreăng a troăng kân kong pơlê 1 rơxế hiăng chiâng prôk lăm. Kơvâ cheăng kong pơlê hiăng khăm ƀă xing xoăng pơkeăng tê kơtê ăm kuăn pơlê, xĕn ối, tơdrêng amê tơdah tơniăn môi ngế châi ối kŭn ing kơpong ki ôh tá châ prôk lăm a dêi pó pơto djâ pơlât.

Pôa Nguyễn Cảnh Tùng, Kăn hnê ngăn Vi ƀan cheăm Ƀuôn Đôn tối ăm ‘nâi, khu râ kăn pơkuâ hiăng pơtân xo hdrối kơxô̆ liăn tŏng gum a mâu tíu xĕn ối, hbrâ pơkhom, kơmung, tơmeăm kal xúa rêm hâi ƀă pơkeăng ăm kuăn pơlê. Tiô tối hdrối tung to lâi hâi la ngiâ, drêng têa hiăng xiâ tâi tâng, kuăn pơlê kô chiâng vêh mơgrúa ƀă tơniăn tơdroăng rêh ối.