Xông tơpui a roh hôp, pôa Phạm Minh Chính, Ngế pro xiâm hnê ngăn tơnêi têa tối ăm ‘nâi, vâ chê 2 khế hiăng hluâ, Chin phuh, Ngế pro xiâm hnê ngăn Chin phuh rơtế mâu khu xiâm, kơvâ cheăng, cheăm, bêng kĭng têa kơxĭ kơtăng khât, tơkŭm hên tơdroăng pêi pro khế hbrâ mơdât IUU ƀă pơkâ pêi “Khŏm kơtăng tơplâ mơdât ƀă tơnăng ká xi xŏng IUU, khŏm mơ-eăm tah lôi “theh trĭng” dêi EC ƀă tơdroăng tơnăng ká Việt Nam tung hơnăm 2025.

Ngế pro xiâm hnê ngăn tơnêi têa pơkâ thế tơkŭm mơjiâng tơbleăng tiô pơchân tối dêi EC, tâng tơbleăng tá hâi châ thế vêh séa ngăn, ai tíu inhên, xing xoăng hnoăng inhên. Tối nhên mâu tơdroăng pơkâ pro to lâi, kơbố pêi, pêi môi tiah lâi, châ pơkâ mơ’nui hơnăm 2025 cho thế tah theh trĭng IUU.

Tơdrêng amê, Ngế pro xiâm hnê ngăn tơnêi têa tối pơkâ pêi ôh tá xê to ối a tơdroăng tah “theh trĭng” dêi EC mê ki kal tâ cho mơnhông krá tơniăn dêi kơvâ ká xi xŏng Việt Nam; pơkuâ tơdroăng pêi cheăng tơnăng ká xi xŏng ƀă tơnăng ká thế ai hnoăng, ti tăng xiâm kối, rak vế ká xi xŏng, tâi tâng xua inâi kơnâ dêi tơnêi têa, dêi hdroâng mơngế, xua pơxúa dêi kuăn pơlê.