Mâu tơdroăng châ tơƀrê mê kum mơnhông xiâm kối krá kâk, chông mơdêk tơnêi têa pin mot tung chal nếo, vâ pêi pro pơkâ tơtêk 2 kơxô̆ tung hneăng ki nếo, ing hơnăm 2026 troh a hơnăm 2030 ƀă  chiâng tơnêi têa mơnhông pêi lo liăn hên a hơnăm 2045.

Môi tuăn ƀă mơnhên tối ‘na tơdroăng cheăng kâ kân ƀă tơdroăng hiăng pêi pro tiô pơkâ troăng hơlâ ai chêh tung hlá mơ-éa, Phŏ Yăo sư - Tiê̆n sih Trần Hoàng Ngân, Kăn Kuô̆k hô̆i hneăng 15, tối tiah kố: Kơxô̆ ki chĕn dêi tơnêi têa pin tung hơnăm 2025 bú ối 36% (tâng vâ pơchông ƀă tối tơbleăng hdrối 60%) cho tơdroăng ăm hno ki hôm, mơhno ivá rak ngăn tơbrê, kum ‘mâi mơnhông tuăn loi dêi khu ‘no liăn pêi cheăng ƀă mâu khu tơrŭm cheăng lâp plâi tơnêi a liăn ngân xiâm Việt Nam.

Pakĭng mê, mâu tơdroăng pro tơdâng kân tung xo liăn ngân, cho ki xiâm kal kí vâ tơdâng ƀă kơxô̆ liăn xo tơ’mot - hrê liăn ngân ‘no pêi cheăng, cho  ki xiâm kal kí vâ tơdâng ƀă kơxô̆ liăn ăm ‘no pêi cheăng vâ mơnhông tơƀrê. Pôa Trần Hoàng Ngân tối nhên:

“Ƀă tơdroăng pơkâ ‘no liăn mơnhông bú 2,8 rơtuh rơtal liăn mê mơ’nui hneăng kố pin hiăng pêi châ 3,4 rơtuh rơtal liăn ăm ‘na tơdroăng ‘no liăn cheăng pro tơmeăm khoăng cheăng kâ - pơlê pơla. Kố cho tíu ki a hlo tơƀrê má môi. Kơnôm mê, pin hiăng ‘no liăn châ pro troăng kân tơdrăng lĕm, troăng kân kĭng têa kơxĭ, mâu kơno tuk, tơraih tơƀai, troăng pakĭng víu 4 Hà Nội, troăng pá kĭng víu 3 Pơlê kong kân Hồ Chí Minh ƀă hên hngêi trung, hngêi pơkeăng châ mơjiâng pro”.

‘Na pêi lo tâk GDP, tâng ôh tá riân hơnăm 2021, cho hơnăm ki tơdjâk pơreăng COVID-19, pêi lo tâk cheăng kâ dêi tơnêi têa pin châ 7,2% tung 4 hơnăm pơtối mê hlối. Hơnăm 2025, kơxô̆ liăn châ xo ing tê rôe tơmeăm kong têa ê dêi Việt Nam tối hdrối châ a kơlo 900 rơtal USD. Kố cho môi kơxô̆ ki hên nếo. Ing môi tơnêi têa cheăng kâ pá puât ối kơtiê,  troh nôkố tơnêi têa pin hiăng chiâng môi tơnêi têa cheăng kâ ối tung Top 20 dêi mâu kong têa ki tê mơdró kân tung lâp plâi tơnêi.

Ƀă troăng hơlâ tơmiât ôh tá pơtê cho mơnhông tơƀrê rĕng ƀă krá kak, mâu hnoăng cheăng ‘na mơnhông cheăng kâ dêi tơnêi têa hiăng châ mơhno tối ing mơnhông tơƀrê ‘na tŭm tơdroăng rêh ối pơlê pơla ƀă ki rơkê ‘na kuăn mơngế. Kơxô̆ ki mơnhông dêi kuăn mơngế Việt Nam châ ‘mâi hơ’lêh nhên, tâk 37 râ, tâk a kơxô̆ má 46 tung inâi chêh pá ối má to lâi kơxô̆ ki hơniâp tung lâp plâi tơnêi hơnăm 2025, hên tâ tâng vâ pơchông ƀă mâu kong têa ai tơdjuôm pê lo liăn. Tiê̆n sih ngăn cheăng kâ Lê Duy Bình tối:

“Túa pêi lo tâk dêi pin ôh tá xê to ‘na pêi cheăng kâ ki tơrŭm ƀă mê cho mơnhông ‘na kuăn mơngế, xo kuăn mơngế pro xiâm, xo hyôh kong prâi pro xiâm, hlo rơxông tung la ngiâ pêi cheăng tiô pơkâ vâ mơ-eăm mơnhông vâ pin ai môi tơdroăng cheăng pêi tâk krá tơniăn, vâ ăm ai môi tơdrăng rêh ối lĕm ro ăm kuăn cháu tơná pin tung xo ah hmôi”.

Tơdrêng ƀă mâu tơdroăng cheăng kâ ki ê, kơvâ cheăng ‘na khoa hok kong ngê̆, hơ’lêh nếo hriăn plĕng ki nếo ƀă pơ’lêh kơxô̆ dêi tơnêi têa pin xuân ai mâu hvêa prôk ki rĕng. Kơxô̆ pơ’lêh nếo hriăn plĕng ki nếo tung lâp plâi tơnêi hơnăm 2025 dêi Việt Nam ối má 44/139 to kong têa tung kơpong. Tơmeăm khoăng kơxô̆ mơnhông rơdêi, po rơdâ lâp lu; ki rơdêi dế Intơrnet lăm troh ukố umê  ối Top má 20 tung lâp plâi tơnêi. Tê mơdró điê̆n tưh mơnhông rơdêi rĕng, ki tâk riân 20% tung hơnăm. Ing tơdroăng ki ai khât dêi khu mơdró, pôa Nguyễn Hữu Sơn, Kăn hnê ngăn Grup ATS tối: 

“Pin hlo ki mơ-eăm, kơdôu mơ-eăm kân khât dêi Chin phuh, pro hlâu ăm khu mơdró. Mê cho tơdroăng ki lĕm khât. Tơdroăng cheăng tung kơvâ liăn ngân, á hlo kơvâ cheăng kố dêi Việt Nam dế ai hên ki rơdêi ƀă ki tâk hên rĕng, dế mơhno ăm tơná mot tung ki rơdêi ƀă troăng hơlâ mơnhông cheăng kŏng ngê̆ kơxô̆, liăn ngân kơxô̆’’.

Hlê nhên khât ƀai hriâm châ tối tung Hlá mơ-éa chêh: “Tŭm troăng hơlâ, luât pơkâ thế pơxiâm ing púi vâ, ki pơxúa tơxâng khât ƀă hơniâp dêi kuăn pơlê, tơniăn tối ăm ‘nâi tâi, tơbleăng tơdrăng. Xo ki môi tuăn, ki rah xo dêi kuăn pơlê, khu mơdró pro loăng vế hdró vâ tối tơdroăng cheăng dêi mâu kăn ƀô̆ pêi tơƀrê lơ ôh. Mơhnhôk ai tuăn vâ pleăng xua tơnêi têa, pơtối rak vế tuăn tơmiât vâ mơ-eăm, khên tơmiêt, khên pêi, khên pơ’lêh nếo, hriăn plĕng ki nếo, khŏm pêi pro ƀă chiu pôu râng tâi dêi hnoăng cheăng xua vâ pro pơxúa tơdjuôm”, jâ Lưu Thị Thanh Mẫu, Phŏ Kăn hên ngăn khu mơdró rơkê hơnăm ối nếo Việt Nam tơngah:

“Tơdrêng ƀă tơdroăng pêi pro dêi Chin phuh điê̆n tưh, tơdjêp ƀă kơxô̆ hoă ƀă mơdêk ivá dêi rêm râ kong pơlê mê a tơmiêt tiah kố râ khu xiâm ƀă Chin phuh kô tơbleăng rĕng châ Pơkâ 66 ƀă Pơkâ 68 dêi Khu xiâm Kal kí. Tiah mê, tơdroăng hơ’muăn pơla luât pơkâ ƀă pêi pro troh ki ai khât kô mơhnhôk mơnhông cheăng kâ dêi tơnêi têa pin mơnhông môi tiah Kăn xiâm pơkuâ hnê ngăn Đảng hiăng tối nhên kố cho rơxông ki mơnhông tơná dêi hdroâng mơngế. Pin kô rơtế ƀă dêi rơpó vâ ‘mâi mơnhông môi tơdroăng cheăng kâ rơkê ƀeăn, mơnhông dêi Việt Nam xông rơdêi chiâng tơnêi têa cheăng kâ má môi dêi lâp plâi tơnêi”.

Tung pơla mơnhông cheăng kâ dêi tơnêi têa 5 hơnăm hdrối, xuân ối ki pá kal tơkâ luâ, bă ƀai hriâm vâ hlo nhên châ tối nhên a tung Hlá mơ-éa chêh dêi Đảng. Laga, ƀă mâu hnoăng pêi ki kân tung mơnhông cheăng kâ hơ’lêh nếo, ƀă ivá rơdêi ‘nâi tơrŭm dêi rơpó ƀă púi vâ mơnhông tơƀrê, hdroâng mơngế Việt Nam dế hvêa prôk krá rơdêi troh chal ki nếo chal mơnhông kro hên, hơniâp, tơrŭm ƀă pơkuâ dêi.