Rôh on chếo hngêi a 0 chôu 46 phut hâi lơ 24/5. Kŏng an pơlê kong kân hiăng thế 50 ngế kăn ƀô̆, mâu lêng thâ lăm troh a tíu on chếo tơrŭm ƀă mâu khu ki ê dêi mâu kăn ƀă kuăn pơlê a mê veăng tơpâ on chếo. Troh 0 chôu 52 phut,; mâu tíu pêi cheăng hiăng troh veăng tơpâ, mơdât oh tá ăm on châ lân chếo kâ ƀă tơmeăm tí tăng ‘nâi, tăng mơngế, tŏng kum mâu ki kreăng.

On hiăng koh kân pro chếo tâi hên rơxế hon đa, rơxế mái kơtâu ƀă on tơhrik, rơxế mái ki hmâ to a kơpong plông, ngôi on ƀă hyôh ki ‘mêi hiăng kơneăng lâp lu kơpong mê. Mâu khu cheăng tơpâ on hiăng tơkŭm ‘nhiê khuă, vâ mot tung hngêi vâ tŏng gum ối 7 ngế ki kreăng, tung mê ai 3 ngế tro rong châ djâ pơlât a hngêi pơkeăng. Troh 1 chôu 26 phut, hiăng kâi tơpâ tâi on. Klêi tí tăng ngăn, mâu khu râ pơkuâ cheăng tơpâ on hiăng châ hlo 14 ngế hlâ.