Rêm rôh tơbâ hâi tơleăng leăng peăng Hdroh, pro tơnêi têa tơrŭm chiâng môi, pôa Y Nhuôm Ƀyă a ƀuôn Dak Tuôr, cheăm Čư̆ Pui, tơring Krông Bông, kong pơlê Dak Lak mê vêh chôu pâ mâu hâi khế ki veăng bro yu kit plâ xâ Mih. Pôa tối, rôh ki mê nah, đô̆i yu kĭch dêi pơlê xua tơdroăng ki hnê mơhno dêi ngế ki pơkuâ xah đô̆i trưởng Y Ơn Niê hiăng hên xôh plâ, khŏm vâ pôi tá tro xâ rup vâi krâ nhŏng o lo “kơpong tơkŭm”.

Pâ Hoa tối, maluâ tâng to idrâp ƀom, răng pháu, kuăn pơlê tung pơlê Dak Tuôr xuân dế ối mơ-eăm pêi chiâk deăng, vâ tŏng kum kế kâ ăm kăch măng.

“Vâ kum ăm rôh tơplâ, vâ kum ăm mố đô̆i pin ngế ki kŭn pêi cheăng kŭn ngế ki kân pêi cheăng kân ôh tá chiâng thu, pin athế tŏng xo tơnêi têa dêi tơná. Kơpong hngế hngo, ‘nâi cho hdroâng kuăn ngo la pôi tá ăm tơnêi têa hía châ ngế ki ê pơkuâ”.

Klêi kơ’nâi hâi tơnêi têa châ tơleăng pro tơrŭm chiâng môi, Đảng ƀô̆, kăn pơkuâ, kuăn pơlê mâu hdroâng kuăn ngo cheăm Čư̆ Pui rĕng ‘mâi mơnhông mâu tơdroăng ki klêi kơ’nâi rôh tơplâ, veăng tơlo ivá tơ’noăng pêi cheăng kâ, khŏm mơ-eăm mơjiâng pơlê cheăm rế hía rế mơnhông. Ing tíu ki ôh tá ai kế kâ, ôh tá ai ếo xâp, tơdroăng pêi cheăng kâ ôh tá hlê plĕng, nôkố hên rơpŏng tung cheăm hiăng mơ-eăm pro kro mơdrŏng ƀă tơdroăng ki pêi châ liăn lối hrĭng rơtuh rêm hơnăm. Pôa Y Sự a ƀuôn Khanh, cheăm Čư̆ Pui, phiu ro tối:

“Kơlo rêh ối dêi vâi krâ nhŏng o nôkố tâng pơchông ƀă hdrối nah hiăng rế hía rế hơ’lêh. Vâi krâ nhŏng o nôkố hiăng xúa tơdroăng ki pêi cheăng kâ tung kơdrum a tơnêi pro đông dêi tơná nah. Ai mâu rơpŏng ki ‘nâ hăng xúa khoa hok kih thuât mê nôkố vâi hiăng chía niân tâ tâng pơchông ƀă hdrối nah”.

Cheăm Čư̆ Pui, tơring Krông Bông, kong pơlê Dak Lak ai 13 to thôn, pơlê ƀă 2.700 rơpŏng kuăn pơlê, lối 14 rơpâu pơ’leăng mâ mơngế, hdroâng kuăn ngo châ vâ chê 90%. Troh nôkố, cheăm kơpong hngế hngo kố hiăng ai on tơhrik trâ eăng, mâu hngêi trung hriâm hngêi pơkeăng, hno têa, têa krúa ƀă hên ki ê hiăng ƀă dế mơnhông tơƀrê.

Pôa Y Kok M’Drang, kăn pơkuâ ngăn Đảng cheăm Čư̆ Pui, ăm ‘nâi, rơtế ƀă tơdroăng ki tơmâng ngăn ‘no liăn dêi Tơnêi têa, vâi krâ nhŏng o mâu hdroâng kuăn ngo a cheăm dế tơdjuôm ivá môi hiâm mơno mơjiâng thôn pơlê nếo. Cheăm kô pơtối mơdêk hnoăng cheăng djâ troăng ahdrối dêi đảng viên mơhnhôk kuăn pơlê hơ’lêh túa tơmiât, túa pêi, tơrŭm hnê tối khoa hok kih thuât tung pêi chiâk deăng, mơnhông cheăng kâ.

“Tơkŭm ƀă pơkâ troăng tơmiât pêi ăm mâu vâi pú cho đảng viên cho ngế ki djâ troăng ahdrối tung mơnhông cheăng kâ rêh ối pơlê pơla. Ƀă túa pơkâ “Đảng viên pêi kuăn pơlê kô pêi ƀối”. Tung túa pơkâ mê môi tiah khu pơkuâ tơdroăng kal kí ngin pơkâ troăng mơnhông cheăng kâ cho xiâm mơdêk hnoăng cheăng mơnhông rơpŏng cheăng kâ vâ mơnhông hơ’lêh kơmăi kơmok, hơ’lêh tiô chal nếo”.

Mơdêk khôi hmâ kăch măng, ing kơpong hngế hngo kơpong hdroâng kuăn hên xơpá, cheăm Čư̆ Pui dế mơ-eăm rơdêi ‘na cheăng kâ rêh ối pơlê pơla vâ tơxâng ƀă inâi ngoh khên tơnôu.