Pôa Lê Minh Ngân, Ngế xiâm phŏ ngăn Khu xiâm ngăn tơmeăm khoăng tung têa, a tơnêi ƀă hyôh kong prâi tối tơbleăng mâu tơdroăng ki nếo tung Luât Tơnêi tơníu hơnăm 2024. Tiô pôa Lê Minh Ngân, Luât Tơnêi tơníu hơnăm 2024 cho ƀô̆ luât ki kal, tơdjâk troh tung pơla mơnhông mơdêk cheăng kâ rêh ối pơlê pơla a mâu kong pơlê.

Xua mê, pêi pro hnê mơhno dêi Chin phuh, Khu xiâm ngăn tơmeăm khoăng tung têa, a tơnêi ƀă hyôh kong prâi hiăng ƀă dế mơjiâng bro mâu tơdroăng pơkâ, túa pơkâ hnê mơhno pêi pro luât ƀă tơdroăng ki khŏm rĕng xúa Luât Tơnêi tơníu hơnăm 2024 a hâi lơ 1/7/2024.

Luât Tơnêi tơníu hơnăm 2024 malối tơmâng ngăn khât troh mâu ngế ki châ pơlê pơla kum, mâu ngế ki pêi chiâk deăng, mâu rôh ki pêi pro chêl thiê̆n, tŏng kum pro pơlê ố ƀă xo tơvêh tơnêi, pro pơlê nếo hdrối vâ xo tơvêh tơnêi.