Pôa Tô Lâm, Ngế cheăng tung tíu xiâm kal kí, Ngế xiâm ngăn Kŏng an, Kăn Kuô̆k hô̆i hneăng 15 ối tung Khu kăn Kuô̆k hô̆i kong pơlê Hưng Yên hiăng châ Kuô̆k hô̆i pôk pro Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam, hơnăm 2021 – 2026. Pơkâ ‘na tơdroăng ki pôk pôa Tô Lâm pro Kăn xiâm hnê ngăn xuân châ mâu kăn Kuô̆k hô̆i têk kŏng tơbleăng ƀă 472/473 ngế kăn veăng têk kŏng môi tuăn (châ  96,92% tung tâi tâng mâu kăn Kuô̆k hô̆i).

Kăn xiâm hnê ngăn tơnêi têa ki nếo tơhrâ dêi tơná môi hiâm mơno ƀă Tơnêi têa, Kuăn pơlê ƀă Luât a ngiâ Kuô̆k hô̆i drêng krâ kơlŏng to pro kăn. Đăi tươ̆ng Tô Lâm kot mâ hơnăm 1957, a cheăm Nghĩa Trụ, tơring Văn Giang, kong pơlê Hưng Yên; cho Yăo sư Khoa hok An ninh, Tiê̆n sih Luât học. Pôa cho ngế cheăng tung tíu xiâm Đảng hneăng XI, XII, XIII; Ngế cheăng tung Khu xiâm ngăn tơdroăng kal kí hneăng XII, XIII ƀă cho kăn Kuô̆k hô̆i hneăng 14, 14. Ing hơnăm 1988-1993, poa Tô Lâm pro ngế xiâm phŏ pơkuâ ƀơrô cheăng Khu xiâm rak vế tơdroăng kal kí I, Ngế xiâm ngăn Kŏng an.

Tung 13 hơnăm pơtối, pôa pro kăn phŏ pơkuâ khu rak vế tơdroăng kal kí I mê nếo Ngế xâm ngăn Rak vế tơdroăng kal kí  III, Ngế xiâm ngăn kŏng an. Ing hơnăm 2006 – 2009, pôa Tô Lâm pro kăn phŏ pơkuâ Khu xiâm Gâk kring, Khu xiâm ngăn Kŏng an. Tung 2 hơnăm pơtối mê, pôa pơkuâ mê pro kăn khu xiâm ngăn Tổng cục An ninh I, Khu xiâm ngăn Kŏng an. Pôa Tô Lâm pro kăn phŏ ngăn Kŏng an ing hơnăm khế 8/2010 troh khế 4/2016. Klêi mê, pôa pro ngế xiâm ngăn Kŏng an troh nôkố.