Kơvâ rak ngăn ‘na loăng pơlái kuăn kiâ kong hiăng hbrâ tŭm mơngế, kế tơmeăm vâ hbrâ tơpâ mơdât on chếo kâ kong, vâ hbrâ ăm, vâ ing mê, teăm mơdât tơdroăng xía vâ drêng lơ tro on chếo kâ. Tiô khu rak ngăn kong dêi kong pơlê Dak Lak tối, rơnó khăng khoăng hơnăm kố ton hiăng 4 khế, hên ƀăng kong a mâu tơring Ea Súp, Ƀuôn Đôn, Ea Hleo, Krông Bông, Ea Kar dế tơ’lêi tro on chếo kâ a râ má 5, tơkéa cho râ ki kân ó dêi tơdroăng xâu xía.

Tung roh ki pơtâng tối tơdroăng xâu xía kố, xuân ai tá Kơdrum kong ilâng Yok Đôn, Kơpong ngăn kong Ea Sô ƀă Kơdrum kong ilâng tơnêi têa Chư Yang Sing ƀă hên mâu kong ki ê. Kong a mâu tơring Lăk, Krông Ana kô tơ’lêi tro on chếo kâ, la a râ ki chía tâ tâng vâ pơchông ngăn ƀă kong ilâng dêi mâu Kơdrum ilâng tơnêi têa ki hiăng tối kơpêng mê âi.