Ki rơhêng vâ tối, kong pơlê pơkâ thế mâu cheăm bêng pêi klêi tơdroăng ‘mêng rơnêu hngêi trăng ki tro tơ’nhiê hdrối hâi lơ 30/11; xoăng tíu ối pơtân tơniăn ƀă pro nếo, vêh pro tíu kuăn pơlê ối ăm mâu rơpŏng ki ai hngêi tơhnâp, hngêi tro têa mơhiu hdrối hâi lơ 31/01/2026. Tiô mơ-éa pơtroh, kong mê hiăng prăng, têa lân hiăng xoê; mâu cheăm bêng athế veăng ối a cheăm bêng, malối cho kơpong ki tro têa lân lu trâu, pro tơklâ krê, vâ ‘nâi nhên tơdroăng ƀă tơbleăng pêi mâu hnoăng cheăng ‘mâi mơnhông ƀă hiâm mơno pêi pro rĕng, tưƀrê.

Kơjo xiâm tơdroăng ki châ achê tâi tâng mâu rơpŏng ki tro klâ krê ôh tá ai troăng lo, châ gum tơdrêng mâu kế kâ, têa ôu, kế tơmeăm xúa; pôi tá ăm kuăn pơlê kơklêa, hngíu. Kong pơlê Dak Lak pơtroh mố đô̆i, kŏng an, đoân viên droh rơtăm ƀă kuăn pơlê veăng xut xêa, kui tah mâu trâp tơnêi mơgrúa lĕm hngêi trăng, hngêi trung hriâm, hngêi pơkeăng pơlât, troăng prôk; rĕng ‘mêng rơnêu troăng kơxái on tơhrik, têa, troăng kơxái internet.

Mâu cheăm bêng athế séa ngăn, chêh riân tơmeăm ki tro lŭp; tơdah xo ƀă axoăng tơmeăm tơdrăng tơbleăng nhên, tơdâng tơ’mô, tro mơngế.