Rơtế ƀă tơdroăng kal pêi pro tơdrêng mơgrúa lĕm kong prâi tơnêi tơníu, hngêi trung lâm hriâm, kăn pơkuâ kong pơlê Dak Lak pơkâ thế rĕng ăm phái tŏng gum dêi Chin phuh troh ƀă kuăn pơlê; pơtroh kơmăi kmok hrik pơhriâ têa, tíu ki mơ’no têa krúa troh rêm kơpong kuăn pơlê ối; rĕng mơgrúa lĕm hngêi trung, lâm hriâm, hngêi pơkeăng pơlât vâ mâu kế tơmeăm xúa kố rĕng châ xúa má môi; xing xoăng tro tơdroăng ki tŏng gum dêi mâu ngế krê, khu tơrŭm pleăng dêi tơmeăm troh a kơpong têa kân lân lu, pôi tá ăm tơdroăng ki hâ ho a troăng prôk, tơdjâk troh mâu tơdroăng cheăng ‘mêng rơnêu mâu hngêi trăng troăng klông xua kong mê pro ƀă hên ki ê.

Pôa Tạ Anh Tuấn, kăn hnê ngăn Vi ƀan kong pơlê Dak Lak, tối nhên: khía mơhot rôh má 15 hiăng vâ mot a Biển Đông, kăn pơkuâ tâi tâng mâu cheăm bêng kơpong têa lân lu kal tŏng gum kuăn pơlê teăm tơdrêng, pôi tá ăm kuăn pơlê ôh ti ai tíu ối, pôi tá ăm kuăn pơlê kơklêa, kăng hngíu. Tơdrêng amê hlối athế hbrâ rơnáu mâu rơxế, tơmeăm vâ hbrâ ví ƀă kong mê khía mơhot tung mâu tơdroăng.