A rôh hôp, mâu kăn hiăng tơmâng mâu kơ koan ngăn tơdroăng cheăng hnê tối nhên mâu tơdroăng ki kal vâ pêi tơdroăng tâ phĭu, mê cho: tơdroăng ‘na mơngế (Khu Tơkŭm cheăng Tỉnh ủy);  tơkŭm po hôp kuăn pơlê, hôp tơpui tơno, tơbleăng inâi mơngế vâ lo tơbriât pro kăn (Vi ƀan Măt trâ̆n tơnêi têa Việt Nam kong kân); mơjiâng, rak ngăn ƀă pơkâ kơxô̆ liăn tâ phĭu (Khu xiâm ngăn liăn ngân kong pơlê); ngăn tơdroăng cheăng tơkŭm po tâ phĭu (Khu ngăn mơngế pêi cheăng kong pơlê); tơdroăng ăm tăm pŏng, pro tơniăn, kring gak tơniăn (kong an kong pơlê); ƀă mâu tơdroăng tơbleăng tối ‘na tâ phĭu (Khu xiâm ngăn Túa lĕm tro, Tơ’noăng ivá ƀă Ôm hyô kong pơlê).

A rôh  hôp,  pôa Lương Nguyễn Minh Triết, Kăn pơkuâ hnê ngăn Tỉnh ủy kong pơlê, Ngế pơkuâ Hnê mơhno tơdroăng cheăng tâ phĭu kong pơlê Dak Lak tối pơchân, nôkố tá khu cheăng kal kí a kong pơlê dế pêi hên tơdroăng cheăng ki kal, malối cho tơkâ luâ xơpá kong mêi têa lu, rêm râ - mâu kơvâ cheăng kal  mơ-eăm tâ nếo tơdroăng cheăng tơná, thâ pêi rĕng, tro tiô khoa hok, “pêi cheăng hên tâ luâ péa hdroh, pái hdroh” vâ hlối tơniăn tơdroăng rêh ối, pêi cheăng dêi kuăn pơlê, hlối tơbleăng tro tơdroăng tâ phĭu.