Pêi tơdroăng “Mơhnhôk pêi pro Quang Trung’’ xua Ngế pro xiâm hnê ngăn Chin phuh mơhnhôk, sap hâi lơ 1/12, mâu đông lêng tung kong pơlê Gia Lai hiăng tơbleăng veăng tơlo liăn pro 100 toăng hngêi ăm mâu rơpŏng kuăn pơlê ki ai hngêi tro tơhnâp tơ’nhiê, têa mơhiu tung rôh mêi khía kân têa lu kố nah. Tung rơdroăng mơhnhôk pêi pro mê, Kuân đoân 34 xo pêi hnoăng cheăng pro 70 toăng hngêi, Khu xiâm pơkuâ ngăn lêng kong pơlê Gia Lai pơkuâ pro 30 toăng hngêi ki u ối.

Mâu lêng tơrŭm krá khât ƀă mâu kăn cheăm kong pơlê vâ tăng ngăn pro ‘ló, xúa tro mơngế, hbrâ tŭm tơmeăm vâ pro, mơngế vâ pêi, tíu kâ ối ƀă rơxế chơ mâu tôh đô̆i ki pro hngêi. Mâu tíu pêi cheăng đông lêng mơ-eăm pêi klêi, pơcháu tâi tâng 100 toăng hngêi hdrối hâi lơ 31/1/2026, kum kuăn pơlê tơdah Têt Lo hơnăm nếo tung mâu hngêi ki nếo, tơniăn, rế lĕm.

-Hâi lơ 1/12, pôa Hồ Văn Mười, Kăn hnê ngăn Vi ƀan kong pơlê Lâm Đồng pơkuâ po hôp ‘no tơdrêng ing troăng hyôh internet ƀă mâu cheăm bêng, pơkâ thế rĕng pro ƀă ‘mêng hngêi ối ăm mâu rơpŏng kuăn pơlê ki ai hngêi tro tơ’nhiê xua rôh kong mê khía mơhot pơla hdrối nah pro.

Tung lâp kong pơlê ai 76 toăng hngêi tro tơhnâp tâi tâng ƀă 749 toăng hngêi tro tơ’nhiê, tung mê cheăm Dran cho cheăm ki ai hngêi tro tơ’nhiê hên má môi ƀă 46 toăng, 17 toăng tơhnâp ƀă 6 rơpŏng kuăn pơlê rêh ối a kĭng têa kroăng Dà Nhim athế lăm lối tíu ê, cho ối tung rơpŏng ki châ xoăng ăm tơnêi pro pơlê ối.

Kong pơlê vâ môi tuăn kơlo gum 120 rơtuh liăn ƀă rêm toăng hngêi tro tơhnâp ƀă 20 – 40 rơtuh liăn ăm mâu toăng hngêi kal ‘mêng rơnêu; tơdrêng amê hlối pơkâ thế mâu cheăm bêng séa ngăn krá tơniăn tơdroăng xúa kơxô̆ liăn tro tơdroăng ƀă rĕng xoăng tơnêi ối ăm mâu rơpŏng ki tá hâi ai tơnêi; rak tơniăn pro klêi tơdroăng ‘mêng hngêi hdrối Têt Lo hơnăm nếo 2025.