O Hoàng Thị Anh Thơ, hok tro lâm 12C1, Hngêi trung râ má pái phôh thong Phạm Văn Đồng, cheăm Ia Sao, tơring Ia Grai, kong pơlê Gia Lai ăm ‘nâi, tơ’noăng mơgêi râ má pái la ngiâ ai pơxúa khât ‘na tơdroăng pơkâ ăm hnoăng tơná. Xua mê, ga hiăng hbrâ rơbot ƀai ing hdrối vâ tơ’noăng rơkê má môi:

“Á chêh tơ’nôm mâu rôh hriâm a hngêi vâ rơbot, hriâm ko ƀai. Má péa, cho ôu kâ tŭm ƀă koi tŭm chôu vâ rak vế hiâm mơno ăm tơleăng lĕm, pơtối hriâm tâp. ‘Na tơdroăng ki chêh inâi tơ’noăng đăi hok mê á châ hngêi trung hnê mơhno nhên, vêh séa ngăn mâu hồ sơ hên hdroh. Mê ‘na hồ sơ chêh inâi tơ’noăng, á hiăng klêi tâi tâng”.

Tối ‘na hnoăng cheăng hbrâ rơnáu tíu tơ’noăng kơxô̆ 11 dêi kong pơlê Ga Lai, thái Nguyễn Trọng Tuấn – Thái phŏ pơkuâ Hngêi trung râ má pái Phôh thong Phạm Văn Đồng, cheăm Ia Sao, tơring Ia Grai ăm ‘nâi:

“Troh nôkố, 186 ngế hok tro hiăng chêh klêi inâi tơ’noăng mơgêi râ má pá ing phần mềm. ‘Na mâu tíu tơ’noăng, hngêi trung hiăng hbrâ tŭm 12 to lâm tơ’noăng, mâu veăng ‘măn ko ƀai tơ’noăng, veăng pêi cheăng dêi hô̆i đong; mâu kơxái on tơhrik, hbrâ mơdât on chếo xuân hiăng châ séa ngăn, rơnêu bro”.

Ƀă a hngêi trung râ má pái phôh thong Hà Huy Tập, tơring Kông Chro, thái Phạm Hữu Hùng – Kăn pơkuâ hngêi trung ăm ‘nâi, hơnăm kố tíu tơ’noăng kố ai 57/246 ngế hok tro cho hdroâng kuăn ngo. Rơtế ƀă tơdroăng ki rak tơniăn hriâm rơbot ƀai ƀă hbrâ rơnáu mâu kế tơmeăm, hngêi trung xuân hiăng hbrâ rơnáu tíu kâ, tíu ối ăm mâu vâi o ki hngế:

“Hngêi trung hiăng chêh bro hlá mơ-éa tơbleăng pơtroh ăm Vi ƀan hnê ngăn tơring pâ tŏng kum rêm ngế o 400 rơpâu liăn tung 3 hâi po tơ’noăng. ‘Na peăng hngêi trung, hnê mơhno khu droh rơtăm tơrŭm ƀă Đoân Droh rơtăm tơring kum ăm 57 ngế o cho hdroâng kuăn ngo ôu kâ a tíu ối tơdjuôm dêi hngêi trung. Rêm hơnăm ƀă hơnăm kố xuân ối tiah mê, hngêi trung ai 12 to veăng tíu ối tơdjuôm ăm mâu vâi o ki xơpá kal chêh inâi vâ ối. Mâu vâi o ki ôh tá ối mê khu ki tŏng kum a rơnó tơ’noăng kô tơdah xo ƀă chiân mâu vâi o”.

Tiô tối hdrối, tơ’noăng râ má pái phôh thong tơnêi têa hơnăm 2024 a kong pơlê Gia Lai ai lối 15.200 hok tro tơ’noăng. Tung mê, ai lối 14.400 ngế o hriâm lâm 12 ƀă 800 ngế o cho khu hok tro hriâm hdrối mê hía nah. Kong pơlê xoăng 41 tíu tơ’noăng ki păng ‘nâng ƀă mâu tíu tơ’noăng ki hbrâ a 17 to tơring, pơlê kong krâm, pơlê kong kơdrâm. Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai tơrŭm ƀă mâu kơvâ cheăng kŏng an, khu ngăn khăm pơlât, on tơhrik ƀă hên ki ê hbrâ rơnáu rak vế tơniăn tung rôh tơ’noăng. Tơdroăng ki hriâm tâp túa pơkâ ƀă hnoăng cheăng tơkŭm po tơ’noăng, phần mềm pơkuâ ngăn tơ’noăng, hlá mơ-éa chêh inâi tơ’noăng ăm lối 15.200 ngế pơrá hiăng klêi. Pôa Nguyễn Văn Long – Kăn phŏ pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai ăm ‘nâi tơ’nôm:

“Ing nôkố troh hâi tơ’noăng, khu ngăn hnê hriâm vêh séa ngăn mâu inâi, hâi kot mâ dêi mâu hok tro tơ’noăng, tơkŭm hnê hriâm hnoăng cheăng ngăn tơ’noăng, pơtối tơkŭm séa ngăn kơtăng túa pơkâ tơ’noăng ăm kăn ƀô̆, thái cô ngăn tơ’noăng ƀă mâu ngế ki veăng tơ’noăng. Mâu tơdroăng kố kô châ pêi pro pơtối, đi đo, ing nôkố troh hâi tơ’noăng. Khu ngăn hnê hriâm ƀă hnê mơjiâng tuăn ngoâ rơkê tơrŭm ƀă Vi ƀan hnê ngăn mâu tơring mơnhên tối nhên tơrêm tíu tơ’noăng, ing mâu kơƀăng tăng, kế tơmeăm xúa troh mâu ngế ki chêh inâi tơ’noăng vâ ai tơdroăng tŏng kum tơtro”.

Ƀă tơdroăng ki hbrâ rơnáu krâu, Gia Lai dế tơmiât troh hneăng tơ’noăng mơgêi râ má pái phôh thong tơnêi têa 2024 tơniăn ƀă kơtăng.