Tơdjâk troh môi tíu pêi pro hmŏng to nếo tro Kŏng an kong pơlê Dak Lak châ hlo ƀă rup phak, xua hiăng xúa trếo pơkeăng ‘mêi tung inâi pơkeăng oh tá ăm phêp xúa tung pêi pro tơmeăm kâ a Việt Nam, Tíu xiâm ngăn ‘na krúa lĕm ƀă mơnhông kơchơ tê mơdró - Khu xiâm ngăn ‘na Chiâk deăng ƀă Mơnhông thôn pơlê nếo ai hlá mơ-éa chêh pơtroh ăm Khu xiâm ngăn ‘na Chiâk deăng ƀă Mơnhông thôn pơlê Dak Lak pơkâ thế tơbleăng  tối mâu tơdroăng ki tơdjâk troh ‘na tơdroăng mê.

Tơbleăng tối mê tá: Tơdroăng pêi pro rak ngăn krúa kế kâ xua kong pơlê pêi pro ngăn ƀă mâu tíu pêi cheăng pro xôi luât rơtế ƀă mâu tơdroăng pơxâu phâk. Pơkâ thế tăng xiâm rêi xo tơvêh ƀă mâu tơdroăng hiăng pêi pro ta troh nôkố. Tơbleăng mê ai pơtroh ăm ‘na Khu xiâm ngăn ‘na krúa lĕm kế kâ, pro kế tơmeăm kế kâ ƀă Mơnhông kơchơ mơdró hdrối hâi lơ 30/12/2024.

Pakĭng mê, Khu xiâm ngăn ‘na Chiâk deăng ƀă Mơnhông thôn pơlê Dak Lak kal tơtrŏng mơdêk hnê tối, tơbleăng troh ăm kuăn pơlê, tíu pêi cheăng tê mơdró kế kâ tơmeăm ki pê lo ing chiâk deăng tung kong pơlê mâu pơkâ ƀă tơdroăng pêi pro séa ngăn, ‘na rak tơniăn krúa tung pêi cheăng pêi pro, tê mơdró kế kâ. Mơdêk tơdroăng séa ngăn, tăng ngăn tơdroăng pêi pro mâu  tơdroăng cheăng hiăng châ xing xoăng ăm kơ koan rak ngăn tơring, cheăm tung kong pơlê vâ teăm ‘mâi hơ’lêh, pro tơniăn xêt, tơƀrê tơdroăng cheăng rak ngăn tơniăn krúa kế kâ tiô râ.