Tung hơnăm 2024, kơvâ ngăn ‘na chiâk deăng hiăng tơkâ luâ hên xahpá, pơtối cho tơdroăng ki hâk phiu. Tâi tâng kơvâ ngăn ‘na chiâk deăng hiăng kơdo mơ-eăm pêi pro lĕm tro ƀă tơniăn châ pêi lo luâ hnoăng pơcháu 04/05 hnoăng cheăng ki Chin phuh hiăng pơkâ thế, tung mê, khŏm pêi lo hên kế tơmeăm, liăn ngân GDP dêi tâi tâng kơvâ chiâk deăng châ tâk troh a 3,3%; kơxô̆ kế tơmeăm pêi lo ing tơdroăng tơnăng păn ká xixŏng tê ăm kong têa ê châ 62,5 dollars, châ kơlo ki hên má môi. Tơpui a roh hôp mê, pôa Phạm Minh Chính mơnê ƀă loi tơngah mâu hnoăng pêi pro dêi kơvâ ngăn ‘na chiâk deăng hiăng châ pêi pro tung hơnăm 2024.

Pakĭng mê, Ngế pro xiâm hnê ngăn xuân hiăng tối nhên mâu tơdroăng cheăng ki ối tơvâ tơvân, ki ối ‘ro kal athế ‘mâi mơnhông tung hơnăm 2025 pơkâ thế kơvâ ngăn ‘na chiâk deăng pơtối mơdêk rĕng hên ó tâ nếo, khŏm pêi lo kế tơmeăm ing 3,5% troh a 4%. Ngế pro xiâm hnê ngăn loi tơngah tiah kố, kơvâ ngăn ‘na chiâk deăng tung hơnăm 2025 ƀă la ngiâ ah kô pơtối mơnhông hên tơdroăng cheăng ki ó rơdêi hên tâ nếo, pêi mơjiâng tơmeăm hên, pêi rĕng, dâi lĕm, châ pơxúa kân khât; tơnêi têa pin hiăng chiâng môi to kong têa ki ai tơdroăng pêi chiâk deăng tiô chal nếo, krúa lĕm, ai hên hdrê loăng, kong kế, hyôh rơngiâp, mơnhông krá tơniăn, tơdrăng ƀă pôu râng hnoăng cheăng.