Tung rôh lăm pôu pêi cheăng a kong pơlê Hà Tĩnh, kơxê hâi lơ 27/12, pôa Trần Thanh Mẫn - Kăn xiâm hnê ngăn Kuô̆k hô̆i hiăng pêi cheăng ƀă khu pơkuâ hnê ngăn cheăng Đảng kong pơlê Hà Tĩnh ‘na tối mơgêi tơdroăng pêi pro tiô Pơkâ hôp dêi Đảng xiâm lâp tơnêi têa rôh má 13, Pơkâ hneăng hôp kân Đảng ƀô̆ kong pơlê rôh má 14, hneăng hơnăm 2020 - 2025 ƀă tơbleăng Pơkâ dêi Vi ƀan pơkuâ cheăng Kuô̆k hô̆i ‘na tơdroăng tah, xing xoăng mâu tíu pêi cheăng mâu kăn pơkuâ râ tơring, cheăm dêi kong pơlê pơla hơnăm 2023 - 2025.

Klêi hmâng kăn hnê ngăn kong pơlê Hà Tĩnh tơbleăng, mâu ngế tung khu kăn mê tối hâk hlo tâk kơxô̆ tơmeăm pê lo (GRDP) dêi kong pơlê  tơdroăng  Hà Tĩnh châ 7,48%, xo  liăn ing tê tơmeăm tung kong pơlê châ 9.600 rơtal liăn tung tâi tâng kơxô̆ liăn xo nâp ăm hngêi rak liăn dêi plâ hơnăm ai vâ chê 18 rơpâu rơtal liăn. Hà Tĩnh cho tíu ki bâ eăng prôk hdrối tung lâp tơnêi têa tung mơjiâng thôn pơlê nếo.

Mâu kăn tung khu lăm pêi cheăng púi vâ Hà Tĩnh thế pơtối po troăng, tah mâu tíu ki pá tơvâ tơvân vâ mơnhông tơƀrê tâ nếo, mơ-eăm mơdêk kơlo tâk châ péa kơxô̆. Pôa Trần Thanh Mẫn - Kăn xiâm hnê ngăn Kuô̆k hô̆i tối, ƀă mâu tơmeăm khoăng ai hlâu, ki tơ’lêi dêi Hà Tĩnh tâng châ po rơdâ kô mơnhông tơƀrê tâ nếo, ôh tá pơtê to a tơdroăng ki mê.

Rôh kố hơnăm nếo Ất Tỵ tung kơxê hâi lơ 27/12, a tơring Thạch Hà, kong pơlê Hà Tĩnh, pôa Trần Thanh Mẫn - Kăn xiâm hnê ngăn Kuô̆k hô̆i hiăng lăm pôu, hbru tơmeăm ăm rơpŏng ai hnoăng tơnêi têa ki trâm pá a mâu  tơring Hương Sơn, Thạch Hà ƀă pơlê kong kơdrâm Hà Tĩnh.