Troăng pêi tơrŭm ƀă hâi khế pêi cheăng tung la ngiâ, Ngế pro xiâm hnê ngăn tơnêi têa tối nhên tơ’nôm mâu tơdroăng kal mê cho 1 tơdroăng cheăng xiâm. Tung mê, tơdroăng xiâm cho mơdêk tâ nếo ki tơƀrê, pơxúa tung tơdroăng tơrŭm cheăng pơla péa pâ.

Má péa, tơmâng khât troh tơdroăng rêh ối tơmeăm khoăng ƀă tuăn ngôa dêi mơngế pêi cheăng. Mơdêk tơpui tơno, tơpui ƀă dêi rơpó pú hên, ki xiâm cho liăn khế, liăn mơhá, chôu pêi cheăng, chôu pơtê, tơniăn krúa tá ai tơdroăng klâi tung pơla pêi cheăng; tơmâng tŏng kum mâu ngế ki xơpá, mâu ki ối a kơpong hngế hngo, tíu tơkăng kong, a chuăn têa kơxĭ.  Ngế pro xiâm hnê ngăn tơnêi têa tối nhên, kal tơmâng khât ‘na hngêi ối ăm mâu ngế pêi cheăng.

Má pái, tơmâng kring vế hnoăng rêh ối, ki pơxúa tro luât dêi mâu ngế pêi cheăng tro tiô luât, ƀă tiô troăng rơhlâ, luât pơkâ dêi Đảng. Mơdêk hnoăng cheăng lăm ngăn, tăng ngăn, séa ngăn tơdroăng pêi pro tro tiô luât ki ai tơdjâk troh hnoăng ki pơxúa dêi đoân viên, mơngế pêi cheăng ƀă khu tơrŭm cheăng dêi kŏng đoân.