Tơbleăng a hneăng hôp, pôa Trần Duy Đông, Kăn phŏ Pơkuâ tơdroăng Pơkâ ƀă ‘no liăn cheăng ăm ‘nâi, Chin phuh pêi tơdroăng Pơkâ kơxô̆ 66 ‘na tơdroăng cheăng dêi Chin phuh pêi tơdroăng Pơkâ 41 dêi Khu xiâm Kal kí. Ing mê, pơkâ sap nôkố ta troh hơnăm 2030, ki iâ ai 2 rơtuh khu mơdró, tung mê mơnhông hên mơngế rơkê mơdró kâ pơkuâ mâu Grup cheăng kâ rơdêi, ai ivá rơdêi, ai ivá rơkê tơbriât cheăng tung tơdroăng mơdró kâ tung tơnêi têa ƀă lâp plâi tơnêi, pơtối rak hnoăng cheăng pro troăng pơkuâ djâ mâu kơvâ cheăng, kơvâ cheăng ki kal dêi cheăng kâ.

Tơbleăng hnê mơhno hneăng hôp, pôa Nguyễn Trọng Nghiã, Ngế pơkuâ hnê mơhnhôk cheăng Tơnêi têa tối, vâ tơdroăng Pơkâ 41 dêi Chin phuh rĕng châ xúa tung rêh ối, kal thế pơhlêh nếo, tơbleăng pêi; tơmâng séa ngăn, hnê tối, ngăn nhên; hbrâ tro tŭm tơdroăng, mơngế pêi cheăng tơmeăm khoăng ƀă mơ-eăm pêi tro tơdroăng kal kí, mơ-eăm khât tâ nếo châ tơdroăng Pơkâ pêi châ tơƀrê.