Klăng leh tơbâ Hâi mơjiâng khu Kŏng an kuăn pơlê Việt Nam ƀă hâi ‘’Tâi tâng kuăn pơlê gâk kring Tơnêi têa, pin rơtế troh ƀă cheăm Ea Ktur, kong pơlê Dak Lak – tíu ki kuăn pơlê hdroâng kuăn ngo hiăng hluăn n ing kơtiê, mơ-eăm pêi kâ, rêh ối phâi hơtô, hơniâp ro tung tíu ki tơniăn lĕm, cho tơdroăng mơnhên ‘na tơdroăng hiâm mơno tơrŭm pơla khu kŏng an ƀă kuăn pơlê

A ƀuôn Kniết, cheăm Ea Ktur, kong pơlê Dak Lak, rơpŏng nâ H’Lối Êban (kuăn ngo Rơđế) to dêi hngêi nếo tung hiâm mơno sôk ro tơtô, ai kơdrâm vâi krâ nhŏng o tung pơlê. Hngêi nếo klêi pro lĕm, tâi tâng kơnâ 400 rơtuh liăn, châ pro a tơdế kơdrum kơphế ngiât plâi agrut, hvái ngăn peăng ƀăng klâng hlo hơniâp ro, phâi tơ tô,

Nâ H’Lối tối: Hdrối nah cho rơpŏng kơtiê, châ Tơnêi têa kum ăm hdrê ro păn hiăng ai 2 to kuăn; rơpŏng hngêi tê dêi ro kŭn, pro hdrê păn chu kăn vâ ăm ai kuăn, nếo klêi tê dêi châ 50 rơtuh liăn. Nôkố, kơxô̆ liăn pêi lo dêi  rơpŏng  hngêi cho kơnôm ing 6 sao kơphế ki pêt tơvât ƀă tiu, plâi sầu riêng. Kuăn kơnốu ki kân nếo klêi vêh pro lêng, kuăn kơdrâi kŭn dế hriâm phôh thong. Ai tơdroăng rêh ối tơniăn ro, hơniâp môi tiah hâi kố, H’Lối Êban tối:

“Mơnê mâu vâi tăm kŏng an hiăng rak ngăn kring vế kuăn pơlê, kring vế tơniăn pơlê pơla. Kŏng an xuân hnê kuăn pơlê rak vế pêi pro tro troăng hơlâ Tơnêi têa pêi cheăng xông tơƀrê. Môi tiah rơpŏng hngêi á, ing rơpŏng kơtiê hiăng tơkâ luâ xơpá. Kơphế, tiu ai yă ƀă xuân ai plâi sầu riêng, păn tơnôm ro, păn chu kơdĭng, mê rơpŏng hngêi hiăng pro kêi môi toăng hngêi kố’’.

Nâ H’Nhân Niê ối a ƀuôn Kram cheăm Ea Ktur tối ăm nâi, hrĭng ngế Kŏng an xuân tơkŭm mơhnhôk tâi tâng kuăn pơlê veăng kring vế Tơnêi têa. Ing mê, kum kuăn pơlê rĕng ‘nâi plê̆ng tơdroăng khu ‘mêi hriăn pro ôh tá tro, vâi pơlông djâ kuăn pơlê tơklâ dêi dêi rơpó ôh tá tá tơrŭm ƀă dêi rơpó pơla hdroâng mơngế. Kŏng an xuân hnê nhên ăm ‘nâi tơdroăng ki khu ‘mêi hriăn hêak pơloi vâ kâ kơluâ tơmeăm khoăng tung măng, tơdroăng mâu  rơtăm pro xôi luât prôk drô troăng... Nâ H’Nhân Niê tối vâi kơdrâi cheăm  Ea Ktur đi đo rơtế ƀă tơdroăng mơhnhôk “Tâi tâng kuăn pơlê kring vế Tơniăn Tơnêi têa”.

“Nâ o vâi kơdrâi pin ối a hngêi thế hnê kuăn nĕng kuăn cháu pôi tá po  măng xah hô̆i like ƀă pôi tá chia seh chêh tơdroăng kố tơdroăng mê, pôi tá pro tiu khu ‘mêi pơlông thế pro tơdroăng ki tơnhiê tơnêi têa, tơnhiê pơlê pơla. Ngin đi đo hnê pơchân kuăn pơlê, đi đo hnê pơchân kuăn ‘nĕng kuăn cháu, drêng prôk drô troăng thế rak tro luât, hiăng tŭm hơnăm mê nếo chiâng ăm to rơxế. Tung khu vâi kơdrâi xuân hnê kuăn nê̆ng kuăn cháu, nâ o tung pơlê ki achê hơngế pôi tá hmâng rơkong khu ‘mêi pơlông djâ ing kong têa ê’’.

Cho Mục sư rak ngăn Chi hô̆i Tin Lành cheăm Ea Ktur, pôa Y Djian Êban ối a buôn Kniết, cheăm Ea Ktur- Cheăng tung Hô̆i đong kuăn pơlê dêi kong pơlê Dak Lak ăm nâi: Tơdroăng rêh ối dêi kuăn pơlê phâi tơtô, hơniâp ro, tơniăn loi tĭng, tiô khôp, tơniăn to khôp xuân kơnôm ai veăng kring vế dêi mâu lêng kong an rêm râ.

“A hlo kŏng an sap ing cheăm troh kong pơlê veăng kring vế tơnêi têa ƀă kum ăm kuăn pơlê ngin châ rêh ối hơniâp. Pơtih, tâng ôh tá ai kŏng an mê kuăn pơlê prôk drô troăng prôk ôh tá rak luât xua ôh tá hlê; kô ai hên tơdroăng xía vâ tơklâm rơxế, tơpeăng dêi rơpó klêi mê chiâng ai hên tơdroăng ki ê. Kong an tơdroăng pêi apoăng cho kring vế tơnêi têa, má péa cho kring vế pơlê. Tơdroăng mê cho kal khât ƀă kơnía ‘nâng’’.

Hiăng 23 hơnăm hmâ achê ƀă tơdroăng cheăng Kong an, trung tá Y Sila Êban, Tôh trưởng tôh Kring gak - Kong an cheăm Ea Ktur, kong pơlê Dak Lak hâk tơngăm xua tơná hiăng veăng ‘no hnoăng kring vế tơnêi têa, kring vế  tơniăn pơlê pơla.

“Nôkố, á xuân ai môi ngế kuăn kơnốu dế hriâm kong an, tiô hriâm cheăng môi tiah á. Púi tơngah kuăn pơlê pôi tá rĕng tơmâng loi khu ‘mêi pơlông djâ pro tơdroăng oh tá tro, mê thế mơ-eăm pêi cheăng pêt kơphế, pêt tiu vâ mơnhông cheăng kâ ăm rơpŏng hngêi”.

Apoăng hơnăm kố, a cheăm Ea Ktur, Khu droh rơtăm Kong an kuăn pơlê - Khu xiâm Kong an tơrŭm ƀă  mâu tíu pêi cheăng a Dak Lak tơkŭm po tơdroăng ‘’Vêh a pơlê’’. Tơdrêng ƀă tơdroăng tơbâ troh lăm pôu, hbru tơmeăm ăm mâu rơpŏng ki ai hnoăng tơnêi têa ai on veăng lơ kuăn ‘nĕng hlâ xua tơplâ nah, tơdroăng mê hiăng mơjiâng pro 3 to Hngêi ăm kuăn pơlê tơkŭm hôp, kơjo kum mơjiâng pro 1 toăng hngêi hâi lơ 19/8, 1 toăng hngêi ai tuăn pâ; pơcháu 1 tơmeăm khoăng  pro “Veăng ‘măn kơmăi tính ăm vâi o”  ƀă diâp 100 hnoăng liăn hriâm rơkê nâl Ănglê, hbru 20 toăng rơxế mái ăm hok tro.... Trung Tá Du Lê - Ngế pơkuâ Kong an cheăm Ea Ktur, kong pơlê Dak Lak ăm ‘nâi, tơbleăng pêi mâu tơdroăng pêi pro rôh kố cho lăm tăng rup mâu ki ai xôi vâ kring tơniăn tơnêi têa, pơlê pơla hdrối vâ troh leh tơbâ 80 hơnăm Kăch măng Khế Tơheăm, ƀă hâi mơjiâng tơnêi têa lơ 2/9 ƀă hneăng hôp Đảng rêm râ, mâu lêng mơdêk hnoăng cheăng lăm séa ngăn kring vế báu loăng plâi, kring vế hnoăng pêi cheăng ăm kuăn pơlê.

“Rôh kố Kŏng an mơdêk hnoăng cheăng tơplâ mơdât mâu ki ai xôi tung rôh pro tơniăn rơnó plâi sầu riêng, rơnó plâi cau. Mâu nhŏng o lăm pơtrui tăng ngăn tung pơlê cheăm, trâm mâu ƀok, mâu ngế veăng hnê ngăn tơdroăng loi tĭng tiô khôp, ngế kuăn ngo ki kuăn pơlê pâ nhoăm tung kơpong kuăn ngo, hnê pơchân kuăn pơlê kring vế tơmeăm khoăng, ngăn mâu loăng plâi tung rơnó ai plâi. Pakĭng mê, tơrŭm ƀă kŏng an, tâng châ nâi ai ngế ki lâi nhôm mê thế teăm tối tơbleăng ăm kong an cheăm”.

Vêh lăm troh a cheăm Ea Ktur, kong pơlê Dak Lak tung mâu hâi khế Tơheăm ton nah, môi rơnó ngiât to loăng kơphế, tiu, plâi sầu riêng kơtóu hên agrut... tơbleăng môi tơdroăng rêh ối phâi tơtô. Vâ pơlê Ea Ktur mơnhông tơƀrê, mâu lêng kong an hiăng ƀă dế rơtế ƀă kuăn pơlê tung kơpong tơmiât, tơdroăng cheăng pêi; rak tơniăn, mơdât khu ‘mêi ai tuăn tơmiât vâ pro tơklâ ki tơrŭm môi tuăn dêi hdroâng mơngế, Kring vế ki tơniăn lĕm-hơniâp ro ăm rêm ngế kuăn pơlê.