Kăn xiâm pơkuâ hnê ngăn Đảng, Kăn xiâm hnê ngăn tơnêi têa Kŏng hòa Yân chuh Nhân yân Lếo pôa Thongloun Sisoulith hâk ro ƀă  hlối rơkâu pôa Tô Lâm drêng pôa châ rah xo pro Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam a Rôh hôp má 7 Kuô̆k hô̆i hneăng 15, mơhno tuăn loi ƀă khĕn kơdeăn khât dêi Đảng, Tơnêi têa ƀă Kuăn pơlê Việt Nam ‘măn ăm pôa.

Pôa Tập Cận Bình,Kăn xiâm hnê ngăn kong têa Sinuâ rơkâu pôa Tô Lâm châ pro kăn xiâm hnê ngăn tơnêi têa Kŏng hòa xah hô̆i chuh ngiah Việt Nam, hlối mơhno ki nhoăm tơrŭm pơla Sinuâ - Việt Nam, hbrâ vâ rơtế ƀă pôa Tô Lâm, Kăn xiâm hnê ngăn tơnêi têa pơtối rak troăng rơhlâ, hnê djâ mơjiâng khu tơrŭm kuăn pơlê tung la ngiâ pơla Sinuâ - Việt Nam thăm tơrŭm krá tâ ai pơxúa, rơkâu Kăn xiâm hnê ngăn tơnêi têa pê klêi hnoăng cheăng kân  tâ nếo tung pơla pro Kăn xiâm ki nếo.

Pơtáu kong têa Kul rơkâu pôa Tô Lâm, Kăn xiâm hnê ngăn tơnêi têa hiăng châ Kuô̆k hô̆i tơnêi têa Kŏng hòa xah hô̆i chuh ngiah Việt Nam rah xo pro Kăn xiâm hnê ngăn tơnêi têa ƀă loi khât tiah kố ing hnoăng pơkuâ dêi Kăn xiâm hnê ngăn tơnêi têa, tơnêi têa Kŏng hòa xah hô̆i chuh ngiah Việt Nam kô pêi klêi tơdroăng cheăng kân, mơnhông rĕng tơƀrê ing mâu tơdroăng cheăng ƀă pơtối rak hnoăng cheăng pêi ki kal tung kơpong ƀă lâp plâi tơnêi.