Kơxo lơ 1/12, pôa Tô Lâm, Kăn xiâm pơkuâ hnê ngăn cheăng Đảng rơtế ƀă kơdrâi pôa ƀă Khu kăn xiâm tơnêi têa pin hiăng troh a pơlê kong xiâm Vientiane, pơxiâm mâu rôh lăm pôu râ tơnêi têa troh a Lếo, veăng ai mâ a Leh tơbâ 50 hơnăm hâi Mơjiâng tơnêi têa Lếo ƀă rơtế veăng tơkŭm po Rôh trâm mâ khu râ kăn xiâm pơla Đảng Kŏng san Việt Nam ƀă Đảng Nhân yân Kăch măng Lếo.

Leh tơdah păng 'nâng pôa Tô Lâm, Kăn xiâm pơkuâ hnê ngăn cheăng Đảng rơtế ƀă kơdrâi pôa ƀă Khu kăn xiâm tơnêi têa pin châ tơkŭm po kân krip a Tíu pêi cheăng kăn xiâm hnê ngăn tơnêi têa tiô tơdroăng ki krip má môi ăm mâu kăn xiâm pơkuâ kong têa. Kăn xiâm pơkuâ hnê ngăn cheăng Đảng, kăn xiâm xiâm hnê ngăn kong têa Lếo pôa Thongloun Sisoulith pơkuâ po leh tơdah.

Rôh lăm pêi cheăng kố dêi pôa Tô Lâm, Kăn xiâm pơkuâ hnê ngăn cheăng Đảng cho tơdroăng ki kal ƀă rêm to kong têa la xuân  hdró mâu hvêa chêng prôk tơkâ luâ mâu rôh tơplâ tơplong dêi tơrŭm nhŏng o Việt – Lếo, châ pơloăng mơnúa ing rôh tơplâ, ing mâu rôh tơplâ ki pá puât troh cheăng mơjiâng, rak vế, mơnhông tơnêi têa dêi péa hdroâng kuăn ngo, vâ ing mê pơkâ tơrŭm cheăng xiâm, môi hiâm mơno lĕm, iâ ai tung tơrŭm cheăng ƀă kong têa ê.

Rôh lăm pôu kố dêi pôa Tô Lâm, kăn xiâm pơkuâ hnê ngăn cheăng Đảng tối rơdêi khŏm mơ-eăm dêi péa Đảng, péa Tơnêi têa tung pơtối rak vế, tơbêng ƀă mơnhông tơrŭm môi hiâm mơno xua hơniâp lĕm, tơniăn ƀă mơnhông krá tơniăn dêi rêm kong têa ƀă tung kơpong .