Lối 3.400 toăng plong tuk hiăng châ mơhno tíu ‘măn a 7 kơno  tuk, mâu khu râ pơkuâ cheăng mơdêk hnoăng cheăng tăng ngăn, khŏm thế tâi tâng mâu ngế vê tuk lo ing tuk hdrối 18 chôu hâi lơ 28/11; hlối tăng ngăn vâ chê 180 tíu tơnêi tơhnâp, trâu vâ tơniăn ‘na châ kuăn pơlê.

Tiô pơkâ mơdât tâp tíu hdró ôh tá ăm lăm a têa kơxĭ dêi Vi ƀan kuăn pơlê Khánh Hoà, sap 7 chôu hâi lơ 28/11, tâi tâng mâu plong tuk ki chơ tơmối ôm hyô, tuk chơ tơmeăm, tuk tơnăng ká ƀă mâu plong tuk ki ê dế ối a têa kơxĭ thế pơtê châ a kĭng; kơ’nâi 18 chôu hâi lơ 28/11 tâi tâng mâu ngế vê tuk thế troh a kĭng; mơngế păn ká xi xŏng ôh tá chiâng ối a long păn.

Kong pơlê Khánh Hòa hiăng pro tơniăn khât tơdroăng tối tơbleăng vâ tâi tâng mâu ngế vê tuk mâu ngế tơnăng ká mâu ki dế ối a têa kơxĭ ‘nâi nhên mâu tơdroăng vâ ai khía kân má 15 plong mot, hlối rơnáu hbrâ ví. Tăng ngăn a mâu kơpong kơno tuk ƀă kơpong ki ôh tá tơniăn, pôa Trần Phong, Kăn hnê ngăn Vi ƀan kuăn pơlê kong pơlê Khánh Hòa pơkâ thế kong pơlê ƀă mâu khu râ pơkuâ cheăng mơdêk hnê tối ăm kuăn pơlê, khŏm mơdât, pơxâu tro luât ƀă mâu ngế ki ôh tá vâ rak luât.