Pơla hdrối kố hía nah, xua tơdjâk dêi mâu rôh kong mêi têa lân lu, hiăng pro hlâ, tơ’nhiê tơmeăm dêi kuăn pơlê Kơpong tơdế tơnêi têa - Tây Nguyên, malối mâu kong pơlê, pơlê kong kân: Dak Lak, Lâm Đồng, Khánh Hoà, Gia Lai, Đà Nẵng. Pêi pro tiô hnê mơhno dêi kăn xiâm pơkuâ hnê ngăn Đảng, Tơnêi têa, Khu xiâm Kong an hiăng mơhnhôk tăng lối 195.000 hdroh ngế kăn ƀô̆, mâu lêng ƀă mâu ngế veăng hbrâ ví xơpá, tơkâ luâ khía mơhot, kong mêi têa lân lu; Tơkŭm tŏng gum 150.000 ngế, veăng kum ăm 500 tâ̆n phái ƀă 4,7 rơtal liăn tŏng gum kuăn pơlê a kơpong tro têa lu.

A rôh leh mơhnhôk, kăn hnê ngăn Khu xiâm Kŏng an kơbông krếo  tâi tâng mâu lêng pơtối pêi ai pơxúa, teăm kum kuăn pơlê ôh tá ai hmê kâ, ôh tá ai têa krúa, ôh tá ai pơkeăng pơlât. Kŏng an mâu kong pơlê hbrâ séa ngăn kơpong rơ-iô, hbrâ mơdât mâu ki xôi xúa drêng kong prâi ôh ti tơniăn ƀă mơdêk tŏng gum kuăn pơlê.