Kố cho troăng tơdjêp ki kal, tơdjêp kơpong Tây Nguyên ƀă kơpong Đông Nam Bộ, kơpong Tây Nam Bộ ƀă Pơlê kong kân Hồ Chí Minh ai ki xŏn dâng 128,8 km, kơlo liăn ‘no dâng 25.540 rơtal liăn.’Na tơdroăng pơkâ vâ ‘no liăn, pôa Nguyễn Văn Thắng, Ngế xiâm ngăn troăng prôk ƀă rơxế kơtâu ăm ‘nâi, tơdroăng tơkêa bro troăng prôk kum mơjiâng troăng prôk ki kal tơdjêp ƀă kơpong Tây Nguyên ƀă kơpong Đông Nam Bộ, tơdjêp ƀă Pơlê kong kân Hồ Chí Minh ƀă mâu kong pơlê Bình Phước, Dak Nông, Dak Lak, Gia Lai ƀă mâu kong pơlê ki ê tung kơpong, pro chiâng tơnêi tơníu mơnhông nếo.

Tơdrêng amê hlối tí tăng ki ai hlâu ‘na xúa tơnêi, mơjiâng ôm hyô, kơmăi kơmok uâ pơliê kế tơmeăm, chiâ xo kế tơmeăm tung kơdâm tơnêi ƀă hên ki ê rế hía rế vêh pêi cheăng kâ kơpong Tây Nguyên; veăng kum pêi pro ƀlêi chiâng mâu tơdroăng pơxúa, hnoăng cheăng mơnhông cheăng kâ rêh ối pơlê pơla, rak vế tơniăn gâk kring cheăng lêng kơpong Tây Nguyên, kơpong Đông Nam Bộ ƀă tơnêi têa tiô Pơkâ Hneăng hôp khu kăn lâp tơnêi têa rôh má 13 dêi Đảng, mâu tơdroăng pơkâ dêi Khu xiâm pơkuâ tơdroăng kal kí hiăng tơbleăng.