Mâu kăn teăng mâ kheăn kơdeăn mâu tíu ki nếo ai tơdroăng ki mơnhông châ tơƀrê môi tiah kơdroh, tơ’lêi hlâu pro mơ-éa, pro kơdroh ƀă pro mơnhên inhên um méa tơdroăng tơkêa bro thế môi tuăn troăng hơlâ mơ’no liăn cheăng, tơdrăng lĕm kơvâ tê mơdró ai pơkâ, mơdêk xing xoăng râ, xing xoăng hnoăng môi tuăn troăng hơlâ mơ’no liăn dêi Ngế pro xiâm hnê ngăn Chin phuh ƀă Kăn hnê ngăn Viƀan râ kong pơlê.

Veăng tơpui a mơ-éa chêh hdrối, mâu kăn teăng mâ môi tuăn ƀă tơdroăng tơ’nôm pơkâ mơdât tê mơdró hât điê̆n tưh ƀă hât hlá ki pế pro tô, tơdrêng amê pơkâ thế tơ’nôm hyôh N2O ƀă mâu trếo pro pôu ‘mêi nếo tung inâi kơvâ ki mơdât mơ’no liăn tê mơdró, vâ gâk kring pơlê pơla. Tơdroăng xiâm châ hên kăn teăng mâ tơmâng cho ‘na troăng hơlâ kơjo mơ’no liăn cheăng ƀă tối rơdêi tơdroăng ki kal thế mơnhên inhên tơdroăng pơla kơjo ƀă tŏng gum.

Kơjo mơ’no liăn cheăng kal tơkŭm a ki dâi lĕm tung inâi kơvâ cheăng ton xŏn, kơjo tung cheăng kâ tuăn ngôa rơkê ƀă kŏng ngê̆ rơxông nếo.