Sap khế 2/2024, mâu Hngêi trung phôh thong hnê Kuăn ngo ai tíu kâ koi ối pơtê tung kong pơlê hiăng hnê mơhno tôh ngăn tơdroăng hnê hriâm tăng ngăn, mơgêi tơdroăng hriâm mâu môn ki pơkâ hnê hriâm ƀă tối tơdroăng ki hriâm rơkê lơ ôh dêi hok tro vâ ai tiô tơdroăng pơkâ thế dêi hneăng tơ’noăng mơgêi hriâm râ má pái phôh thong a tâi tâng mâu môn ki hok tro chêh inâi tơ’noăng.

Klêi ăm hok tro chêh inâi môn tơ’noăng ƀă chêh tơdroăng tơná púi vâ hngêi trung rah xo mot hriâm hngêi trung Đại học a poăng khế 3, pơxiâm sap hâi lơ 1/4 mâu hngêi trung tơkŭm ăm vâi o hok tro rơbot ƀai hriâm ta troh tâi hâi lơ 22/6. Hngêi trung phôh thong hnê Kuăn ngo ai tíu kâ koi ối pơtê kong pơlê Kon Tum hơnăm kố ai 178 ngế hok tro veăng tơ’noăng mơgêi hriâm râ má pái Phôh thông.

Tâi tâng mâu nôu pâ hok tro xuân vâ môi tuăn ƀă tơdroăng ăm dêi kuăn pơtối ối ‘nôi a hngêi trung vâ hriâm rơbot ƀai tơ’noăng ƀă hngêi trung hiăng tơkŭm po ăm vâi o hriâm rơbot ƀai nhên tâ. Mâu kăn cheăm tơring kong pơlê xuân ai pơkâ kơjo kum tơtro, malối ƀă mâu vâi o  rơpŏng kơtiê xơpá, kum vâi o hmiân tuăn hriâm rơbot ƀai ƀă mâu hâi Tơ’noăng mơgêi hriâm râ má pái phôh thông a mơ’nui khế 6 kố ah.