Pơtối hneăng hôp má 7, hâi kố, lơ 25/5, Kuô̆k hô̆i mơdoh chôu plâ hâi vâ tơpui tơno a hngêi hôp kân ‘na Tơbleăng dêi Khu râ kăn séa ngăn ƀă mơ-éa chêh hdrối pơkâ dêi Kuô̆k hô̆i ‘na tơdroăng châ tơƀrê séa ngăn tơdroăng tơpui ‘’Pêi pro pơkâ kơxô̆ 43 hơnăm 2022 dêi Kuô̆k hô̆i ‘na troăng hơlâ liăn ngân, liăn ngân tŏng kum Tơdroăng pêi pro tơniăn, mơnhông cheăng kâ – rêh ối pơlê pơla ƀă mâu pơkâ dêi Kuô̆k hô̆i ‘na mâu tơdroăng tơkêa bro ki kal tơnêi têa troh tâi hơnăm 2023. Mâu troăng hơlâ tŏng kum mâu pơkâ kố nah châ mơnhên cho ‘’kế ki đông’’ ăm hên khu tê mơdró ƀă mơngế pêi cheăng tơkâ hluâ pá puât klêi kơ’nâi pơreăng kân COVID-19.

Klêi kơ’nâi tơdroăng séa ngăn tơdroăng pêi pro Pơkâ 43 dêi Kuô̆k hô̆i ăm hlo, tơdroăng tơbleăng Pơkâ kố cho troăng pêi ki tro, teăm tơdrêng tung tơdroăng cheăng kâ – rêh ối pơlê pơla tơnêi têa trâm ƀă hên tơdroăng pá puât xua tơdjâk râ ó dêi pơreăng COVID-19. Kơnôm mê cheăng kâ ai troăng tơtêk rơdêi tung hơnăm 2022, ƀă kơlo tơtêk GDP châ lối 8%, cho kơlo tơtêk hên má môi tung hneăng hơnăm 2011 – 2022.

Khu râ kăn séa ngăn dêi Kuô̆k hô̆i xuân mơnhên: Mâu troăng hơlâ ‘na liăn ngân, tơdroăng mung liăn tung Pơkâ 43 hiăng teăm tơdrêng tŏng kum tơdroăng ki hngăm ‘na liăn ngân ăm mâu ngế tro tơdjâk râ ó xua pơreăng COVID-19 tung mâu hneăng pá puât má môi.