Tung mê, mâu kơpong xiâm, mâu tíu mơdró ôm hyô dêi kong pơlê hiăng rơdế rơnêu, mơdêk ki dâi lĕm tơmeăm ôm hyô dêi tơná. Rơtế ƀă tơniăn ki dâi lĕm mâu tơdroăng mơdró, kơvâ ôm hyô kong pơlê Lâm Đồng ối mơhnhôk tơdroăng ‘’hâi mêa’’, ‘’chôu mêa’’, mơhnhôk hên tíu cheăng, khu tê mơdró tung kong pơlê mơhnhôk ƀă pêi pro mâu tơdroăng ki mơhnhôk troh tá ah, môi tiah kơdroh yă hngêi ăm tơmối kâ koi ối pơtê, yă vĕ lăm ngăn, diâp kơxuô tơmeăm tơbâ, tê kơtê mâu tour ôm hyô ƀă hía hé vâ mơhnhôk tơmối.

Măng tĭng mêa Ôm hyô Lâm Đồng hơnăm kố dó inâi ‘’Lâm Đồng – Tíu tơkêa troh dêi Reăng ƀă tơdroăng rơhdruê xuăng’’, cho tơdroăng ki kal po apoăng ăm roh ôm hyô rơnó pơtê hriâm hơnăm 2024. Xua mê, pakĭng tơniăn ki dâi lĕm mâu tơmeăm ôm hyô, tơdroăng pơkuâ tơnêi têa tung mâu kơvâ cheăng xuân dế châ mâu tíu cheăng kơvâ cheăng tung kong pơlê thăm pêi pro.