Khu ki pêi dêi hnoăng cheăng dêi Pơlê kong kân Hải Phòng hiăng troh a kơpong ki tro têa kân lân lu a Dak Lak vâ hbru tơmeăm ƀă ‘nâi nhên tơdroăng vâ ai túa pơkâ tŏng gum ai pơxúa ăm vâi krâ kuăn pơlê kơpong têa lân lu. Pơlê kong kân Hải Phòng hbrâ rơnáu pơtroh 500 ngế ƀok thái pơkeăng ăm kong pơlê Dak Lak vâ pơlât ăm kuăn pơlê klêi kơ’nâi trâm têa kân lân lu. Kăn phŏ hnê ngăn Vi ƀan pơlê kong kân Hải Phòng hiăng diâp tơ’nôm kơxô̆ liăn gum 40 rơtal, mơdêk tâi tâng kơxô̆ liăn ki pơlê kong kân gum ăm Dak Lak tung rôh kong mê têa lân lu rôh kố cho 40 rơtal. Rơtế amê, Hải Phòng gum mâu kế tơmeăm xúa, pơkeăng pơlât, kơmăi hrik pơhriâ têa ƀă hên ki ê gum tơdroăng cheăng hbrâ mơdât châi tamo, pơreăng tâ tú klêi kơ’nâi têa kân lân lu, tung rôh kong mê têa kân lân lu kố hiăng tơ’nhiê mâu kế tơmeăm khoăng tiô riân lối 2 rơtal liăn. Ki hdrối tâ, pơlê kong kân pơtroh 21 ngế ki rơkê dêi kơvâ cheăng troh hbrâ mơdât pơreăng, pơreăng tâ tú troh gum Dak Lak. Pôa Nguyễn Minh Hùng tối rơdêi, pơlê kong kân Hải Phòng hiăng hbrâ rơnáu pơtroh gum ăm Dak Lak:

“Klêi kơ’nâi ai rơkong mơgêi dêi Khu xiâm pơkuâ tơdroăng kal kí, Khu ki chêh tơm xo rơkong mê pơlê kong kân Hải Phòng hiăng ai troăng hơlâ tŏng gum, pơtroh ăm kong pơlê Dak Lak. Klêi kơ’nâi kong mê têa kân, môi tơdroăng ki kal cho mơgrúa lĕm tơnêi tơníu ƀă hbrâ mơdât pơreăng. Ngin hiăng ai túa pơkeăng nhên ‘na tơdroăng ki hbrâ rơnáu mâu pơkeăng, mâu ngế cheăng . Ngin hiăng hbrâ gum sap ing 300 – 500 ngế ƀok thái pơkeăng vâ rơtế ƀă Dak Lak pêi pro hbrâ mơdât pơreăng xuân môi tiah pơlât châi tamo.

Pơlê kong kân Hồ Chí Minh hiăng mơhnhôk tâi tâng mâu kơxô̆ liăn gum Khánh Hòa klêi kơ’nâi kong mê têa kân, sap ing khăm pơlât, hbru pơkeăng tê kơtê, gum mâu kế tơmeăm ki xúa, gô̆m văng xoh mơgrúa lĕm tơnêi tơníu kong prâi troh ‘mêng rơnêu hngêi trung hriâm, hngêi pơkeăng pơlât ƀă rak vế tíu pế pơchên kế kâ tê kơtê ăm kuăn pơlê kơpong têa lu. Khu kăn kố hiăng troh a tíu ki têa kân lân lu a Nha Trang, Diên Khánh, Khánh Vĩnh. Ƀok thái pơkeăng Phạm Minh Công, Khu Bok thái pơkeăng hơnăm ối nếo Pơlê kong kân Hồ Chí Minh, tối mâu ƀok thái pơkeăng tung khu hiăng tơdah xo tơdroăng pơkâ ƀă pơxiâm lăm pêi tơdrêng, veăng gum tŭm ăm tơdroăng ki khăm pơlât a kơpong têa lân lu.

“Tung pơla iâ hâi, ngin hiăng hbrâ rơnáu, tơkŭm khu pêi cheăng lăm troh a tíu ki tro têa kân lân lu tơdrêng tung kong măng hlối. Rơhêng vâ veăng gum môi iâ tơdroăng ki xơpá ƀă kuăn pơlê. Xuân môi tiah tơ’nôm hiâm mơno ăm kuăn pơlê kơpong têa lân lu mê tơkâ luâ xơpá”.

Rơtế amê, khu kố ối pro môi tíu pế kế kâ, gum 10 rơpâu troh 12 rơpâu hnoăng hmê kâ môi hâi vâ gum kuăn pơlê mâu cheăm, bêng ki tro tơ’nhiê hngêi trăng tơmeăm khoăng ƀă khu ki tŏng xo. Siêu thĭ Co.opmart –Khu tơrŭm Tê mơdró Pơlê kong kân Hồ Chí Minh a Nha Trang thăm mơnhông roê xo tơmeăm, vâ ai tŭm tơmeăm tê la ôh tá mơdêk yă, vâ ai tơmeăm tung rôh ki kal tơdrêng. Pôa Nguyễn Phước Lộc, phŏ kăn pơkuâ ngăn Đảng Pơlê kong kân Hồ Chí Minh, tối rơdêi, pơlê kong kân kô pơtối tŏng gum Khánh Hòa ai tơdroăng ki kal, ngăn tung tơdroăng séa ngăn ki khât; tơdrêng amê hlối thăm tơrŭm ‘mêng rơnêu hngêi trăng ki hiăng tơ’nhiê.

“Mâu tíu pêi cheăng séa ngăn, xo râng ko ‘mêng rơnêu tâi tâng hngêi trung hriâm ƀă hngêi pơkeăng ki tro tơ’nhiê, rak tơniăn ăm hok tro rĕng châ vêh hriâm ƀă hngêi pơkeăng pêi cheăng tiah hmâ nếo”.

Pêi pro tiô rơkong krếo thế dêi Vi ƀan Măt trâ̆n Tơnêi têa Việt Nam kong pơlê Dak Lak, tung mâu hâi hdrối, hên kơ koan, tíu pêi cheăng khu tơrŭm rơtế ƀă lối rơpâu ngế kuăn pơlê kơpong peăng mâ hâi Lâ kong pơlê hiăng veăng tơlo lối hrĭng tâ̆n kế kâ, têa ôu, hmân ếo, pơtroh gum kuăn pơlê kơpong tro têa kân lân lu peăng mâ hâi Lo. Pôa Y Giang Gry Niê Knơng, Phŏ kăn pơkuâ ngăn Đảng-Kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak, ăm ‘nâi, cheăng tơdah xo ƀă xoăng tơmeăm tŏng gum xuân dế châ tơbleăng pêi tơdrêng.

“Ƀă tơdroăng ki tơrŭm tơdjuôm ivá veăng gum dêi vâi krâ nhŏng o tung kong pơlê ƀă kong pơlê ki ê, mơhnhôk mâu tíu kuăn pơlê ối, tíu khôp pế hmê, kơxuô kơƀăn chưng, kơƀăn tet. Vâ gum tơdrêng troh ăm vâi krâ nhŏng o kơpong têa kân lân lu, kơpong tíu ki ôh tá ai troăng lo. Pakĭng mê, ngin ối pơtối krếo thế, tơdah xo tá liăn ƀă kế kâ, tơmeăm gum vâi krâ kuăn pơlê rĕng tơniăn tung rêh ối"