Vi ƀan Măt trâ̆n Tơnêi têa Việt Nam Pơlê kong kân Hồ Chí Minh ăm ‘nâi, tơdroăng mơhnhôk ƀă tơdah tŏng gum ăm kuăn pơlê mâu kong pơlê Tơdế Tơnêi têa ki tro tơdjâk xua kong mêi têa lân lu hiăng hlo tơƀrê kân. Khu mơhnhôk Tŏng gum pơlê kong kân hiăng châ xo lối 32.400 ngế veăng tơlo ƀă tâi tâng kơxô̆ liăn dâng 245 rơtal liăn.

Tơdrêng amê, dâng 30 rơpâu tơdrong pơkeăng gum ăm rơpŏng hngêi, 700 tâ̆n phái ƀă vâ chê 1.400 tâ̆n tơmeăm kơnâ lối 140 rơtal liăn. Pơlê kong kân Hồ Chí Minh xuân mơhnhôk tâi tâng mâu rơxế, mơngế tŏng kum Khánh Hòa tơkâ luâ xơpá ki rơ-iô ó dêi kong prâi, tung mê, ai tơdroăng diâp ăm 50 rơtal liăn kơjo kum tơdrêng, kum ‘mâi rơnêu 23 toăng hngêi trung hriâm tro tơ’nhiê ƀă rah 650 ngế lăm pleăng hnoăng tơná lăm veăng mơgrúa tah trâp xok a mâu tíu tro têa lu tơ’nhiê ó tơmeăm.

-Hâi lơ 24/11, Khu pơkuâ ngăn lêng Kơpong 4 Khu lêng têa kơxĭ pơtối pơtroh vâ chê 1 rơpâu ngế mố đô̆i rơtế hên mâu tơmeăm xúa troh a mâu kơpong ki tro tơdjâk xua têa kân lân lu ki ó a Khánh Hòa ƀă Dak Lak. Khu lêng têa kơxĭ klâ pro hên troăng, tơkŭm pro lĕm cho kui tah mâu trâp tơnêi lối chât km troăng kuăn pơlê prôk lăm; gum kuăn pơlê mơgrúa lĕm, gô̆m văng mâu xok, kui tah mâu trâp tơnêi a 12 to hngêi trung hriâm, 3 tíu pêi cheăng Vi ƀan hnê ngăn, 1 to tíu khăm pơlât ƀă vâ chê 100 toăng hngêi kuăn pơlê ối tung mâu cheăm Đông Hòa, Tuy Hòa, Bình Kiến, Bắc Nha Trang ƀă cheăm Diên Điền.

Rơtế amê, mâu tíu pêi cheăng tung tâi tâng kơpong hiăng pơtroh ăm kuăn pơlê vâ chê 100 khô̆i têa ôu, 5 rơpâu kơthung xup kơxŏng khăng ƀă hên mâu tơmeăm xúa ki ê môi tiah phái, têa tôu ro, hmân ếo, pơkhom, bung, duh. Khu pơkuâ ngăn lêng Kơpong 4 ăm ‘nâi tơdroăng cheăng xuân ối hên ƀă khu lêng têa kơxĭ kô pơtối gum mâu cheăm bêng tung mâu hâi la ngiâ.

-A Lâm Đồng, kong mêi têa lân lu tung mâu hâi hdrối kố nah pro tơnêi tơhnâp trâu, tơnêi tơhnâp ó, pro ôh tá ai hên troăng prôk  xiâm. Khu xiâm pơkuâ ngăn mơjiâng pro tơmeăm khoăng tơrŭm ƀă kong pơlê mơhnhôk tăng mâu ngế, rơxế vâ gu tơnêi ok hmốu tơbăng, ok a tíu tơnêi rơhê, po troăng ăm têa hiu ƀă séa ngăn vâ ‘nâi kong prâi ti lâi vâ tơniăn ăm kuăn pơlê. Pôa Lê Anh Tuấn - Phŏ ngế pro xiâm ngăn mơjiâng tơmeăm khoăng ăm ‘nâi, tíu pêi cheăng dế thâ tơbleăng ‘mâi pro troăng vâ rĕng ăm kuăn pơlê châ prôk rơxế chơ tơmeăm hlối tơniăn tung pêi cheăng kâ.

Krê troăng kân 20 a văng Mimosa, mâu ngế ki mơjiâng pro pơkâ tung 10 hâi kố hiăng ai troăng prôk pơtân ƀă kô pro klêi tơdroăng tơkêa bro mê tung môi khế. Lâm Đồng xuân pơkâ thế mâu cheăm bêng hbrâ rơnáu troăng hơlâ hbrâ ví, tăng ngăn vâ ‘nâi tíu ki lâi mơni kô tơ’lêi tơnêi tơhnâp vâ rĕng djâ kuăn pơlê lăm ối tíu ê.