Tơhnah tơhnâp, rơheăng, tơhneăng tơ’nhê, cho tơdroăng dế ai a hno têa ki xiâm peăng mâ hâi lo, xŏn 10km, xo têa ing long Ea Sup hạ vêh a cheăm Ea Bung, tơring Ea Súp. Hên kơpong ƀê tong tro tơhnâp chiâng klôh kân rơdâ, kĭng hno têa tro tơ’nhê. Ngoh Nguyễn Văn Phú, hngêi ai 8 sao báu klâng achê hno têa kố a mơ’nui thôn 5, cheăm Ea Bung tối ăm ‘nâi, to lâi hơnăm achê kố, drô rơchôa, hno đi đo ôh tá ai têa hiu xua mê pêi lo báu chu kơdroh troh lối 30%, mơngế pêt báu ôh tá châ rơkâ híu iâ.

“Hno têa gá tro tơhneăng têa châ lo pa kong, xua mê têa hiu vâ troh a mơ’nui thôn 5 ôh tá bê. Vâ pêt mơjiâng mê kuăn pơlê thế chiâ pong têa klôh, xúa têa mâu kơpong têa plông ‘măn kơmăi hrik têa tôh ăm báu. Kơxô̆ liăn mơ’no apoăng hên xua phon rơvât, on tơhrik to kơnâ, hên kuăn pơlê pêt báu tro lŭp’’.

Cheăm Ea Bung, tơring Ea Súp ai lối 1.000 ha báu châ tôh ing têa dêi hno têa ki xiâm peăng mâ hâi lo. Laga klêi kơ’nâi chât hơnăm xúa, ôh tá xê to 10 km hno têa, mê tâi tâng hno têa ki kŭn tơkâ hluâ cheăm, xuân hiăng tơ’nhê râ ó, pro pêt mơjiâng báu tung tâi tâng cheăm tro tơdjâk. Pôa Lê Hồng Hạnh – Kăn pơkuâ hnê ngăn Đảng ủy cheăm Ea Bung tối ăm ‘nâi, tơring hiăng pâ thế Vi ƀan kong pơlê mơ’no liăn rơnêu lĕm.

“Hno têa kố djâ têa vêh a klâng hrá ‘nâng, thăm nếo hên tíu ôh tá ai têa hiu ôh, tơdjâk kân troh pêt mơjiâng tơmeăm. Ngin hiăng pâ thế ƀă pói vâ Vi ƀan kong pơlê mơ’no liăn cheăng rơnêi hno têa vâ pro ti lâi djâ têa teăm tơdrêng troh tâi tâng mâu ƀăng deăng tôh têa ăm loăng plâi dêi kuăn pơlê tung cheăm, vâ pro ti lâi pêi lo tơmeăm châ hên tâ’’.

Ea Súp cho tơring ki pêt báu hên dêi kong pơlê Dak Lak, ai long rơchôa têa kân má môi kong pơlê rơtế mâu hno têa xŏn vâ chê 105 km, hbrâ tôh ăm 8.210 ha loăng plâi; xing xoăng têa ôu hum rôh jíu ăm dâng 20.000 kuăn pơlê. Laga, tiô pôa Trịnh Quốc Bảo – Kăn phŏ pơkuâ Kŏng ti pêi cheăng tiô rơnó môi khu pơkuâ long rơchôa têa kong pơlê Dak Lak, hno têa kố dế tro tơ’nhê hên ƀă hên tíu tơhnâp, tơhneăng.

A mâu tíu ki ê, ƀê tong xuân hiăng pok ƀă têa châ hriâm lo pa kong. Rêm hơnăm kŏng ti châ xing xoăng lối 1 rơtal liăn tŏng kum rơnêu. Krê tung hơnăm 2023, châ Vi ƀan kong pơlê Dak Lak tŏng kum tơ’nôm lối 10 rơtal liăn ing Kơxô̆ liăn hbrâ ví kong prâi pro ôh tá tơniăn dêi kong pơlê, kum rơnêu lĕm mâu tíu ki tơ’nhê, tơhnah tơnâp hên... Laga kơxô̆ liăn kố ôh tá tŭm vâ rơnêu tâi tâng tíu tơ’nhê môi hdroh mâu hno têa kố. Pôa Bảo tối, vâ rơnêu châ tơƀrê, ki kal troh kơxô̆ liăn hên ‘nâng.

“Vâ rơnêu kân, lơ rơnêu tơ’nhê tâi tâng mâu hno têa mê kal thế kơnôm kơxô̆ liăn tŏng kum dêi Tơnêi têa, vâ rơnêu tâi tâng ăm krá lĕm xuân thế ai lối 100 rơtal liăn nếo tŭm. Kơxô̆ liăn châ xo ing kơxô̆ liăn pơxúa tơdjuôm, tŏng kum hbrâ ví kong prâi pro ôh tá tơniăn mê ôh tá tŭm ôh’’.

Kong pơlê Dak lak nôkố ai vâ chê 620 long rơchôa têa ƀă hdoăng lối 650 rơtuh met khô̆i têa; 161 rơchôa têa, 76 tíu hrik têa, ƀă péa kơ’noăng têa. Tung mê, hên tơmeăm long rơchôa têa hiăng tơ’nhê ó, pro ôh tá tơniăn long rơchôa têa, ki rơhêng vâ tối cho tơdroăng xúa mơ’no têa. Hên tơmeăm rơchoâ têa, long têa, hno têa a kong pơlê Dak Lak tro tơ’nhê, tro lŭp troh chât rơtal liăn. Laga, tơdroăng rơnêu dế trâm pá xua tá hâi mơ’no kơxô̆ liăn vâ rơnêu bro.

A tơring Ea Súp troh nôkố, kuăn pơlê pêi chiâk deăng hiăng klêi pôe báu rơnó xeăng tô, hbrâ pơchoh tơnêi, pêt rơnó xeăng têa hơnăm 2024. Ƀă troăng hno têa tá hâi châ rơnêu, mê chât rơpâu ha dêi kuăn pơlê tíu kô mơni kô pơtối trâm ƀă rơnó kơdroh pêi lo tơmeăm drêng ôh tá tơniăn bê têa tôh.