Kơxê tơkăng kong Ia Nan (tơring Đức Cơ, kong pơlê Gia Lai) kong tô téa ó 38 đô̆ C, tô ó ‘nâng, pro ôh tá kâi ối. Rơxế pơto kơthung têa dêi Kŏng ti pêi cheăng tiô rơnó môi khu 72, Ƀinh đoân 15 hiăng troh a thôn Đức Hưng vâ xing xoăng têa ăm kuăn pơlê. Nâ Siu H’Úc tối ăm ‘nâi, tâi tâng mâu têa klôh tung thôn pơrá hiăng xiâ tâi, kuăn pơlê ôh tá bê têa vâ pế kâ:

“Ôh tá bê têa cho pá puât, hmâ vâ ai hên liăn ngân xuân ôh tá châ rôe têa. Mơhúa ‘nâng mô đô̆i Kŏng ti 72, Ƀinh đoân 15 ăm kuăn pơlê. Kuăn pơlê phiu ro ‘nâng’’.

Tâi tâng toi klŏng chuâ têa ing rơxế pơto kơthung têa djâ dêi tíu kơdoăng têa dêi rơpŏng, nâ Lê Thị Thu Hà tối, kuăn pơlê tung thôn tối dêi pó xúa kơdĭng têa, rơtế dêi pó xing xoăng ăm dêi pó têa ki châ tŏng kum ăm:

“Ngin kơdĭng tŭm vâ pế pơchên hmê kơchâi kâ tung to lâi hâi. Têa kố ngin bu pế kâ. Têa xếo kơchâi mê ngin ‘măn vâ tôh loăng plâi kâ, ăm í, ăm chu. Kơdĭng rêm kơto têa hlối’’.

Trung tă Nguyễn Phi Vân – Kăn pơkuâ Kal kí Kŏng ti pêi cheăng tiô rơnó môi khu 72, Ƀinh đoân 15 tối ăm ‘nâi: Cho tíu cheăng kâ cheăng lêng ối tung pơlê, kŏng ti ai rơpâu ngế kŏng nhân cho kuăn pơlê cheăm Ia Nan, tơring Đức Cơ. Drêng ai tơdroăng kong tô khăng khoăng ó, khu râ kăn pơkuâ kŏng ti mơhnhôk kăn ƀô̆, mâu lêng rêm hâi ƀơm ƀă pơto đi đo 3 rơxế kơthung têa ƀă tâi tâng hdoăng châ 24 met khô̆i, kum kuăn pơlê tơkâ hluâ hneăng pá puât:

“Kong tô khăng khoăng tơdjâk troh tâi tâng, tá tíu cheăng. Tíu cheăng ngin xuân ai drêng ôh tá bê têa tôh. Laga kăn ƀô̆, mâu lêng, mơngế pêi cheăng dêi Kŏng ti hbrâ xing xoăng têa ki iâ êt dêi tơná ăm kuăn pơlê tung pơlê’’.

Pôa Trần Xuân Nghiên – Kăn hnê ngăn Vi ƀan cheăm Ia Nan, tơring Đức Cơ, kong pơlê Gia Lai tối ăm ‘nâi: Thôn Đức Hưng a tíu a’ngêi má môi dêi cheăm, xua mê hơnăm ki lâi xuân ôh tá bê têa a rơnó kong tô khăng khoăng hên. Hên hơnăm kố, Kŏng ti pêi cheăng tiô rơnó môi khu 72, Ƀinh đoân 15 pơrá tŏng kum têa ăm kuăn pơlê tung pơlê plâ khế xŏn. Tơdroăng kố hiăng pro krá tơniăn tuăn pâ khu lêng – kuăn pơlê, veăng kum rak tơniăn a tơkăng kong Đức Cơ:

“Khu râ kăn pơkuâ cheăm kheăn kơdeăn tơdroăng Kŏng ti 72 xing xoăng têa ôu um rôh jiếo ăm kuăn pơlê. Tung 15 hâi kố, mê ‘na tơdroăng têa ôu hum rôh jiếo ăm kuăn pơlê a thôn Đức Hưng hiăng châ tơniăn, kuăn pơlê hmiân tuăn. Châ kŏng ti tŏng kum, kuăn pơlê phiu ro, mơnhên tơdroăng veăng kum dêi Kŏng ti 72 xua tơniăn lĕm tro tŭm tơdroăng ‘na tơdroăng rêh ối dêi kiăn pơlê’’.

Môi tiah mê, a tơring tơkăng kong Ea Súp, kong pơlê Dak Lak, kong tô khăng khoăng ton hâi tung pơla kố nah hiăng pro kuăn pơlê ôh tá bê têa ô hum rôh jiếo ó ‘nâng. Khu mô đô̆i, kŏng an tơring dế pơto rêm rơxế têa xing xoăng ăm kuăn pơlê tơniăn tơdroăng rêh ối. A kơhâi dế, kong tô khăng khoăng lối 4- đô̆ C, jâ Vy Thị Mụn ối a thôn 12, cheăm Ea R’Vê, tơring Ea Súp phiu to xua péa kơthung têa 500 lít ƀă 1.000 lít dêi rơpŏng châ mâu kŏng an troh xing xoăng pêng.

“Rêm hơnăm xuân ối tŭm têa ôu ƀă tôh loăng plâi laga hơnăm kố xiâ sap ing tung hơnăm hlối. Pâ mơnê nhŏng o hên ‘nâng, xing xoăng têa ăm kuăn pơlê ai têa ôu kâ tiah kố cho phiu ro ‘nâng’’.

Xuân châ mâu kŏng an tŏng kum têa teăm tơdrêng, pôa Lò Văn Kiều, ối a thôn 12, cheăm Ea R’Vê, tơring Ea Súp, kong pơlê Dak Lak, phiu ro:

“Péa khế hdrối mê xúa kơnôm têa klôh hngêi achê mê, laga têa klôh vâi xuân hiăng xiâ. Xing xoăng môi xôh tiah mê mê xúa châ 4 – 5 hâi xúa kơdĭng. Khu râ kăn pơkuâ ƀă mô đô̆i, kŏng an xing xoăng têa mê têa ô hum rôh jiếo ôh tá xâu ôh tá tŭm’’.

Thiê̆u tă Đoàn Huy Tưởng, Kăn pơkuâ Kŏng an cheăm Ea R’Vê, tơring Ea Súp tối ăm ‘nâi, rêm hâi mâu thôn, pơlê kô chêh inâi mâu rơpŏng ôh tá bê têa. Kơ’nâi mê, Kŏng an cheăm pơkâ pêi tơrŭm ƀă Khu cheăng kâ cheăng lêng 737 (Kuân khu 5), teăng dêi pó pơto têa krúa troh tíu ăm kuăn pơlê. Tung mê, Kŏng an cheăm Ea R’Vê châ Kŏng an tơring Ea Súp xing xoăng ăm 2 rơxế, ƀă Khu cheăng kâ cheăng lêng 737 ai 3 rơxế pơto têa ăm kuăn pơlê.

“Môi xôh xing xoăng têa ăm môi rơpŏng mê tơdâng sap ing 1 – 3met khô̆i. Rế hía rế ôh tá bê têa ô hum rôh jiếo rế rơdâ. Tơdroăng xing xoăng têa kố xuân hiăng ối tung tơdroăng pêi, pơkâ pêi tŏng kum dêi Kŏng an tơring tung mê ai tơdroăng pơkâ pêi xing xoăng têa ô hum rôh jiếo ăm kuăn pơlê ki ôh tá bê têa ô hum rôh jiếo’’.