Rôh hôp hiăng tối hên hĭn xiâm kối chiâng tơdjâk troh tơdroăng pêi pro, hơ’lêh nếo mâu kŏng ti pêi chiâk deăng, pêt kong a Dak Lak ki ôh tá tơƀrê. Tiah mê, ai mâu troăng hơlâ, túa pơkâ ôh tá tơniăn, tá hâi tro ‘ló, pro tơdjâk troh khu mơdró kâ ƀă mâu ngế ki xo rak ngăn kong. Tíu chêh ‘măn rak mâu tơdroăng ki kal ‘na tơnêi tơníu, ‘na kong tá hâi pêi pro klêi, tá hâi pêi pro châ tiô tơdroăng ki rơhêng vâ tiô tơdroăng ki ai khât.

Mâu kŏng ti pêi chiâk deăng pêt kong tá hâi pêi pro tro hnoăng cheăng pơkuâ ngăn rak vế tơnêi tơníu ƀă kong ki châ pơcháu. Ai mâu kŏng ti hmôu pơ tơkêa xêh ăm mâu khu tơrŭm, mâu ngế krê mung tơnêi drêng tá hâi a tơdroăng pơkâ dêi kong pơlê. Tơdroăng séa ngăn tơnêi vâ hơ’lêh pơcháu ăm kong pơlê pơkuâ ngăn pêi pro tá hâi tro mê chiâng tơdjâk troh tơdroăng pơsăm tối, pơsăm tơkêng ton khế hơnăm.

Pôa Nguyễn Đình Trung, Kăn pơkuâ hnê ngăn Đảng kong pơlê Dak Lak tối, tơdroăng ki pêi pro, hơ’lêh nếo mâu kŏng ti pêi chiâk deăng pêt kong tung pơla hdrối kố nah tá hâi châ tiô mâu tơdroăng pơkâ mơ’no a Pơkâ kơxô̆ 30 hơnăm 2014 dêi Khu xiâm ngăn tơdroăng kal kí. Kong pơlê athế hvái ngăn khât ‘na hnoăng cheăng dêi mâu kŏng ti pêt kong vâ ai mâu troăng hơlâ ƀă mâu rơkong tơpui tối tơdrăng pơtroh ăm Khu xiâm ngăn tơdroăng kal kí, Chin phuh, Kuô̆k hô̆i.