Mâu thái cô tơbâ nếo tơdroăng hriâm rơbot ƀai, tơkŭm hriâm tâp vâ rế hlê, troăng rơhlâ pro ƀai vâ drêng tơ’noăng pro chiâng hlối rĕng, tro tiô pơkâ chêh ko ƀai tơ’noăng, kum mâu vâi o hbrâ tro má môi hdrối vâ troh hneăng tơ’noăng ki kal kí. Tiô pôa Phạm Đăng Khoa, Ngế pơkuâ ngăn Hnê hriâm ƀă hnê mơjiâng tuăn ngôa rơkê kong pơlê Dak Lak tối, hơnăm kố, lâp tung kong pơlê ai lối 21 rơpâu ngế hok tro veăng tơ’noăng mgêi hriâm râ má pái.

Khu xiâm hiăng hnê mơhno ăm mâu hngêi trung ki ai hok tro tơ’noăng mơgêi hriâm drêng hiăng klêi tơ’noăng mơgêi hneăng 2  kô tơbâ hnê tơ’nôm, tơkŭm hnê vâ ‘nâi ngăn tiô ivá bro ƀai tiô khu ko ƀai ki ăm tăng ngăn hdrối ki khu xiâm ngăn hnê hriâm ƀă hnê mơjiâng tuăn ngôa rơkê tơbleăng vâ klâ ngăn ăm hok tro rơbot ƀai  ăm tơtro ƀă ivá.

Ƀă hbrâ nhên ing apoăng, kơvâ ngăn hnê hriâm ƀă hnê mơjiâng tuăn ngôa rơkê kong pơlê Dak Lak tơngah hneăng tơ’noăng mơgêi hriâm râ má pái hơnăm 2024  vâ mâu vâi o kô châ điêm hên.