Luâ 5 rôh tơkŭm po, ki pơ-eăng troh lâp lu dêi hneăng Tơ’noăng rế rơdâ troh hên tíu, ƀă kơxô̆ mâu ƀai chêh tơ’noăng hơnăm kơ’nâi hên tâ hơnăm hdrối. Hneăng tơ’noăng rôh má môi ai 8.129 ƀai chêh, troh hơnăm kố hiăng tâk 541.766 ƀai chêh. Tơbleăng mơgêi a rôh hôp, pôa Nguyễn Xuân Thắng, Ngế pơkuâ Học viện Chính trị Quốc gia Hồ Chí Minh, Ngế pơkuâ hnê mơhno hneăng tơ’noăng chêh  ‘na rak vế tuăn mơno lĕm tro dêi Đảng tối nhên: Tơnêi têa dế hvêa prôk mot tung chal nếo mơnhông tơƀrê nếo ƀă tuăn tơmiât ki nếo, ƀă tơdroăng hmâ pêi pro pâ nhoăm tơnêi têa, púi vâ mơnhông tơƀrê, ing tơdroăng tơrŭm dêi rơpó, ai tuăn mơ-eăm pơkuâ pêi lo dêi, khên tơnôu, ing ivá tơná mơ-eăm dêi, hâk tơngăm dêi hdroâng mơngế châ tơbâ ƀă pơtối rak vế ki rơdêi.

Vâ ai tiô pơkâ mot tung chal nếo mơnhông tơƀrê nếo ƀă tuăn tơmiât ki nếo, Hlá mơ-éa chêh pơtroh ăm Hneăng hôp má 14 dêi Đảng pơcháu ăm Học viện Chính trị Quốc gia Hồ Chí Minh pơkuâ, tơrŭm ƀă Khu hnê mơhno 35 Tíu xiâm, Khu tí tăng ‘nâi plĕng mâu tơdroăng ƀă kum pêi cheăng ăm Khu xiâm Đảng, Khu hnê mơhno 35 râ kong pơlê pơ’lêh nếo troăng hơlâ, tơdroăng tơkŭm po Tơ’noăng chêh hlá tơbeăng ‘na rak vế xiâm tuăn mơno dêi Đảng.