Leh mơhnhôk cho tơdroăng po mâu tơdroăng pơtâng tối, hnê hriâm, mơdêk hlê plĕng hbrâ, mơdât klâk têa ăm vâi hdrêng, hok tro a Dak Lak hơnăm kố. Sap apoăng hơnăm troh nôkố, lâp kong pơlê hiăng ai 25 ngế hok tro hlâ xua klâk têa. Vâ kơdroh tơdroăng kố, kơvâ hnê hriâm ƀă hnê mơjiâng tuăn ngôa rơkê tơrŭm ƀă mâu tíu cheăng ki tơdjâk pêi pro tơdrêng, kơtăng, châ tơƀrê mâu troăng hbrâ, mơdât klâk têa.

Khu pơkuâ hnê hriâm ƀă Hnê mơjiâng tuăn ngôa rơkê Dak Lak pơkâ mâu hngêi trung thăm pơtâng tối, tơbleăng tơdroăng ki rơkê, tơdroăng hbrâ, mơdât klâk têa troh ăm khu hok tro, ki má lối tung mâu hâi pơtê hriâm. Thăm pêi pro tơdroăng hnê klê têa tơniăn ăm hok tro tung hngêi trung, đi đo tơkŭm po lâm hnê klê têa ăm vâi hdrêng.