Khĕn kơdeăn hiâm mơno hbrâ dêi kuăn pơlê ƀă tơdroăng mơ-eăm dêi mâu khu gum tơdrêng a tíu kong mêi têa kân lân lu, Phŏ Ngế pro xiâm hnê ngăn tơnêi têa mơnhên kong pơlê Khánh Hòa hiăng thế hên khu cheăng, tung mê, ai Khu xiâm pơkuâ lêng Kơpong 4 Khu lêng gâk kring têa kơxĭ xúa ca nô plâ măng djâ hrĭng ngế kuăn pơlê lo a kơpong ki rơ-iô.

Khu mô đô̆i, kŏng an ƀă mô đô̆i đăk kŏng ‘na têa pơtối troh a mâu cheăm ki ối tro têa lân lu. Mơhé kơdró têa a mâu tíu dế xiâ, laga lân lu xuân ối ôh tá tơniăn, kong ối mêi, hên troăng kân tro têa lân lu lơ tơhnah tơhnâp. Phŏ Ngế pro xiâm hnê ngăn tơnêi têa pơkâ thế kuăn pơlê pơtối ối a tíu ví têa lân lu vâ tơniăn, ôh tá vêh xêh a hngêi drêng tá hâi ai tơbleăng dêi khu râ kăn pơkuâ.

Troh kơxê hâi lơ 20/11 kong mêi peăng mâ hâi lo - Nam Trung bộ ƀă Tây Nguyên hiăng kơdroh ki rơ-iô ó. Tíu kong mêi hên má môi a kơlo kơpêng 350mm, chu kơdroh tơdế tâng vâ pơchông ƀă têa mêi ki hên ó dêi hâi lơ 19/11. Hngêi kơmăi on tơhrik  Kroăng Ba Hạ xuân hiăng kơdroh kơlo mơ’no tah têa ƀă têa lu a mâu kroăng a Gia Lai, Dak Lak xuân kơdroh.

Troăng kân 29 ki tơdjêp peăng mâ hâi Lu ƀă peăng mâ hâi Lo Dak Lak hiăng châ po ƀă hên tíu hlối djâ tơmeăm ki tŏng gum, kế kâ, têa ôu, pơkeăng pơlât, tơmeăm xúa ƀă hên ki ê... troh a peăng mâ hâi lo ăm kuăn pơlê kơpong têa lu. Kơlo tối tơbleăng ăm ‘nâi hdrối ‘na kong prâi sap ing râ má 3 dêi hâi kố, hiăng chu kơdroh a kơlo 1 tung 2 hâi la ngiâ.

A kong pơlê Lâm Đồng, tíu têa lân lu ó a mâu tíu kŭn tâ, ki hên a mâu cheăm D’Dral, Đơn Dương… teăng peăng hdroh Hngêi kơmăi on tơhrik Dă Nhim, xuân hiăng luâ tơdroăng rơ-iô kal tơdrêng.  1.500 ngế kuăn pơlê hiăng châ djâ lăm ối tíu tơniăn. Klêi têa hiăng xiâ, kuăn pơlê ƀă mâu kăn cheăm dế tơkŭm tơkâ luâ xơpá. Tơdroăng tŏng kum kơpong têa lu a peăng mâ hâi lo - Nam Trung Bộ ƀă Tây Nguyên xuân thâ pêi tơdrêng ƀă hên tơdroăng rơ-iô.

A Lâm Đồng, xua kơxô̆ têa mơ’no dêi Kŏng ti On tơhrik Dă Nhim – Hàm Thuận – Dă Mi ing rơchoăng plế Đơn Dương tâk đi đo tung kơmăng lơ 19/11, ai tíu troh 2.580 met khôi tung môi yâi, mâu cheăm pá xôp têa kroăng Dă Nhim – tung mê ai cheăm Dran – hiăng krăm tung têa kơxĭ. Kong pơlê hiăng thế mơhnhôk khu cheăng, ca nô, plong, tuk, rơxế vâ xĕn lối 1.500 ngế a cheăm Dran tíu tơniăn. Tiô riân  apoăng, ai vâ chê 750 toăng hngêi tro têa lân lu, tơ’nhê râ; 5 toăng hngêi tro lân tung têa; dâng 1.320ha prá alâi tro lŭp.

Kong mêi kân pro hên tíu tơhnah tơhnâp a mâu troăng kân dêi kong pơlê. Pakĭng tíu tơhnâp a văng Mimosa - ối tung Troăng kân tơnêi têa 20  pro troăng klông rơheăng tơhnâp, hên troăng kân thôn pơlê xuân tro tơ’nhê râ. Troăng kân ing cheăm Đan Phượng  lăm cheăm Tân Thanh (nôkố ối tung cheăm Tân Hà – Lâm Hà) tro tơhnâp, troăng klông tro chôm. Kăn pơkuâ Vi ƀan kong pơlê Lâm Đồng pơkâ khu râ kăn pơkuâ mâu cheăm ƀă khu cheăng pơtối xĕn kuăn pơlê lo ing kơpong ki rơ-iô, xing xoăng tíu ối tơniăn, tơniăn tŭm kế kâ, têa ôu, bung, dung, kơmung ƀă tơmeăm kâ rêm hâi.