Hdrối tro chôu vâ hôp, pôa Phạm Minh Chính ƀă tâi tâng mâu ngế ki veăng hôp tung hngêi hôp kân hiăng tu ko hmái hơtĭng iâ phut vâ tơbâ mâu ngế hlâ xua kong prâi pro ôh tá tơniăn; Khu  mơdró hơnăm ối nếo  Việt Nam hiăng ăm 6 rơtal liăn kum tơdrêng ăm 6 to kong pơlê Cao Bằng, Hà Tĩnh, Đà Nẵng, Khánh Hoà, Gia Lai, Dak Lak tơkâ luâ xơpá xua kong prâi pro ôh tá tơniăn.

Khu mơdró hơnăm ối nếo Việt Nam ai dâng 21.000 ngế mâu Khu mơdró hơnăm ối nếo Việt Nam hiăng kum cheăng pêi ăm 5 rơtuh ngế pêi cheăng, châ tâi tâng kơxô̆ liăn xo tơ’mot rêm hơnăm lối 40 rơtal USD ƀă veăng tơlo lối 10% CDP ăm tơnêi têa. Hrĭng rơtal liăn châ ‘măn ăm tơdroăng rêh ối hiăng mơhno nhên tuăn mơ-eăm pêi ahdrối xua hnoăng veăng xua kuăn pơlê dêi khu mơdró hơnăm ối nếo.

Rơkâu mâu hnoăng hiăng pêi pro tơxâng hâk tơngăm khât dêi mâu Khu mơdró hơnăm ối nếo, mơhno ki mơ-eăm, hiăng hlê plĕng khât ƀă hiăng rơdêi dế mâu Khu mơdró hơnăm ối nếo Việt Nam. Ngế pro xiâm hnê ngăn tơnêi têa pơkâ thế Khu mơdró hơnăm ối nếo  Việt Nam pơtối pêi pro, hriăn plĕng nếo tơdroăng ki lĕm, păn roăng, tơrŭm tơdjêp hlối veăng kum mâu Khu mơdró hơnăm ối nếo  pơtối rak vế ki rơdêi, kơhnâ vâ, ing tuăn pâ nhoăm tơnêi têa, tiô hmâ pêi pro tơdroăng ki lĕm ing ton nah dêi hdroâng mơngế, pơhlêh tơ’lêi lĕm, xúa kơmăi, tuăn ngôa ki rơkê kuăn mơngế hriăn pro xúa tung pêi cheăng kâ, tê mơdró; djâ mâu tơdroăng ki pơxúa dêi inâi Việt Nam, tơmeăm Việt Nam châ tơbleăng tê troh kơchơ lâp plâi tơnêi; hlối mơhno ahdrối tung pêi hnoăng cheăng ‘na pơlê pơla.

Rôh kố, Ngế pro xiâm hnê ngăn tơnêi têa pơkâ thế Khu mơdró hơnăm ối nếo Việt Nam pơtối mơhnhôk tơ’noăng “6 ki má môi”, mê cho: Djâ troăng ahdrối, hriăn plĕng má môi, veăng pêi, tơrŭm môi tuăn má môi, khu tơrŭm má môi, ai tuăn lĕm ‘nâi hơ-ui má môi”.