Ngế pro xiâm hnê ngăn tơnêi têa xing xoăng thế pôa Trần Hồng Hà Ngế pro xiâm phŏ hnê ngăn tơnêi têa troh a tíu on chếo hnê mơhno pêi mâu tơdroăng cheăng; pơkâ thế Vi ƀan kuăn pơlê dêi Pơlê kong kân Hà Nội hnê mơhno lăm pôu mơhnhôk, teăm hơlêm, tŏng kum tơdrêng tơmeăm ƀă hơlêm tuăn ngôa rơpŏng hngêi ai ngế hlâ; tơrŭm ƀă krá khât ƀă Khu xiâm Kŏng an hnê mơhno mâu lêng khu râ kơvâ cheăng tơpui pêi tơdroăng tơkâ luâ xơpá xua on chếo.

Apoăng chôu kơxo hâi lơ 24/5, a rôh hôp má 7 Kuô̆k hô̆i, Vi ƀan pơkuâ Kuô̆k hô̆i pâ pơtroh rơkong hơlêm, mơhnhôk mâu rơpŏng ki ai ngế hlâ. Pôa Trần Quang Phương, Kăn xiâm hnê ngăn Kuô̆k hô̆i pơkuâ djâ mâu kăn lăm troh a tíu mê ƀă a hngêi pơkeăng vâ pôu kơ-êng hơlêm mâu rơpŏng ki tro rong râ. Khu xiâm kŏng an hiăng tơbleăng ăm Ngế pro xiâm hnê ngăn Chin phuh ‘na tơdroăng on chếo ki rơ-iô tung pơlê kong kân Hà Nội.

Pakĭng mê, pâ thế Ngế pro xiâm hnê ngăn tơnêi têa hnê mơhno, khu kăn pơkuâ hnê ngăn Đảng pơlê kong kân, Vi ƀan kuăn pơlê dêi pơlê kong kân Hà Nội séa ngăn mâu hngêi ki ăm vâi mung ối ƀă tí tăng ngăn mâu hngêi ối ki môi tiah mê tung lâp pơlê kong kân.