Kong măng lơ 23/11, pôa Phạm Minh Chính, Ngế pro xiâm hnê ngăn tơnêi têa prếi kơdrâi pôa rơtế ƀă khu râ kăn xiâm Việt Nam hiăng lo ing Kŏng hòa Nam Phi, mơgêi tơniăn lĕm tơdroăng ki veăng hôp Rôh hôp khu râ kăn xiâm G20 hơnăm 2025 ƀă hên tơdroăng cheăng pơla péa pâ. Ƀă cho ngế ki châ krếo thế dêi Kăn xiâm hnê ngăn G20, Ngế pro xiâm hnê ngăn tơnêi têa veăng ai mâ tung mâu tơdroăng cheăng dêi Rôh hôp khu râ kăn xiâm G20 rơtế ƀă kăn pơkuâ mâu kong têa tơrŭm cheăng, kong têa ki châ krếo thế ƀă khu tơrŭm lâp plâi tơnêi.

A péa rôh hôp tơpui tơno ‘na mơnhông mơdêk krá tơniăn, tâi tâng ƀă veăng gum dêi G20 ăm môi plâi tơnêi ki khên tơnôu mơeăm xêh, Ngế pro xiâm hnê ngăn tơnêi têa pâ thế G20 mơdêk tơrŭm cheăng lâp plâi tơnêi loi nhuô̆m luât pơkâ, pơkâ tơleăng mâu tơdroăng ki ôh tá môi tuăn, rak vế tê mơdró hên kơvâ cheăng ƀă WTO cho ngế ki ối a dế, rak vế liăn ngân tơdrăng, tơdâng; tơdrêng amê hlối pro tơdroăng mơnhông tung pơhlêh kơxô̆, pơhlêh ngiât.

Rôh kố, Việt Nam ƀă Nam Phi tối tơbleăng mơdêk tơrŭm cheăng tâk troh kong têa tơrŭm cheăng tung la ngiâ, mơdêk rơdêi tơrŭm cheăng kâ kơxô̆, tê mơdró, ‘no liăn pêi cheăng tơmiât troh pơkâ pêi ăm kơxô̆ liăn pêi lo ing tê mơdró pơla péa pâ châ ing 4 troh 5 rơtal USD tung 2 troh 3 hơnăm la ngiâ.