Pôa Phạm Minh Chính - Ngế pro xiâm hnê ngăn tơnêi ƀă jâ Mary Ng  - Ngế xiâm ngăn ‘na mơnhông cheăng kâ, tê mơdró phiu ro xua tơdroăng tơrŭm cheăng kâ tung tŭm tơdroăng pơla péa tơnêi têa ƀă mơnhông tơƀrê po rơdâ tŭm tơdroăng. Nôkố Canada cho kong têa tơrŭm tê mơdró kân má 3 dêi Việt Nam tung kơpong châu Mih ƀă Việt Nam cho tơnêi têa tơrŭm tê mơdró kân má môi dêi Canada tung kơpong ASEAN.

La tơmeăm khoăng tơrŭm cheăng mơnhông pơla péa pâ kân, malối tung kơvâ cheăng dêi rêm pâ ki ai tơmeăm khoăng vâ mơnhông rơdêi ƀă hlối kơjo kum ăm dêi rơpó; Kal thế tăng xúa troh kơlo ki hên má môi mâu tơmeăm khoăng mê ing mâu khu tơrŭm cheăng pơla péa pâ.

Pôa Phạm Minh Chính - Ngế pro xiâm hnê ngăn tơnêi têa pơkâ thế péa pâ pơtối tơrŭm krá vâ mơnhông tung tâi tâng mâu kơvâ cheăng tê mơdró, ‘no liăn cheăng, pơ’lêh ngiât lĕm, pơ’lêh kơxô̆, cheăng ƀă kơmăi kơmok ki dâi lĕm, kơmăi uâ pơliê kế tơmeăm, mơjiâng pro tơmeăm khoăng, hbrâ ví xía vâ kong prâi hơ’lêh, on tơhrik, khoa hok kŏng ngê̆, hnê hriâm, hnê mơjiâng tuăn ngôa rơkê...

Ngế pro xiâm hnê ngăn Chin phuh mơnê ƀă púi vâ Canada pơtối tơmâng, pro tơ’lêi hlâu tâ nếo vâ mơngế Việt Nam a Canada rêh ối, hriâm tâp, pêi cheăng kâ tơ’lêi hlâu, tơniăn a tíu vâi ối; púi vâ  Canada ăm tơ’nôm liăn hriâm ăm mâu sinh viên Việt Nam ki hriâm a Canada.