Hôp po trô troăng pơkâ hôp tơdrêng  mơ’no tiô troăng hyôh internet, pro tơ’lêi hlâu ăm hên mâu kăn ƀă mâu kong pơlê a Tây Nguyên, mâu khu kơvâ cheăng, khu mơdró, kăn teăng mâ mâu kơ koan, khu tơrŭm veăng kum tê mơdró tung tơnêi têa ƀă kong têa ê veăng hôp.

Pôa Vũ Bá Phú, Ngế xiâm pơkuâ Khu xiâm mơhnhôk tê mơdró- Khu xiâm ngăn ‘na tê mơdró  tối, Tây Nguyên cho kơpong tơnêi pêi lo hên tơmeăm ing chiâk deăng , ki hên má môi cho loăng plâi ton hơnăm, loăng plâi kâ.  Mâu tơmeăm tê ăm kong têa ê ối má môi má péa tung kơpong xuân môi tiah lâp plâi tơnêi mê cho kơphế, tiu, krui kơxái, plâi hôt. Tơnêi pêt mâu nhâ pơkeăng kơnía mê cho: Sâm ngọc linh, sâm kơxái, kơxêt linh chi khêi, đinh lăng, hà thủ ô, đương quy, hoa hòe... xuân dế po rơdâ deăng pêt , chiâng kơpong pêt nhâ loăng pơkeăng ki tơkŭm pêt hên a Tây Nguyên.