Roh châm điêm apoăng tơkŭm po tung péa hâi lơ 24 – 25/5 xua Rơ’jíu Việt nam ƀă Rơ’jíu – Um tơvi Tuyên Quang tơrŭm po. Tơ’noăng pơchuât, chêh ƀai hlá tơbeăng hơnăm kố mơhnhôk thế 81 Rơ’jíu ing mâu Rơ’jíu Um tơvi kong pơlê, pơlê kong kơdrâm, mâu tíu cheăng dêi Rơ’jíu Việt Nam ƀă mâu tíu cheăng ối tung Khu xiâm Kŏng an, Khu xiâm lêng veăng ƀă tâi tâng kơxô̆ vâ chê 380 ƀai dêi 10 khu. Ki rơhêng vâ tối, kơxô̆ ƀai chêh pơchuât tung rơ’jíu, um tơvi tâk hên ƀă 37 tíu cheăng veăng.

A roh châm điêm ki apoăng kố, Hô̆i đong kô châm ƀă rah xo mâu ƀai ki rơkê má môi veăng roh Châm điêm tơ’noăng ki má mơ’nui dêi tơdroăng pơchuât, chêh ƀai hlá tơbeăng tơpui mơ’no tung Rơ’jíu lâp tơnêi têa roh má 16, tiô tối hdrối tơkŭm po a kong pơlê Thanh Hóa sap hâi lơ 9 – 14/7 la ngiâ.