Ngế pro xiâm phŏ hnê ngăn tơnêi têa pin tối rơdêi Việt Nam đi đo ngăn Nhuk cho kong têa tơrŭm cheăng xiâm ƀă ton; rơhêng vâ péa pâ pơtối tơrŭm krá rơdêi, rơtế ƀă Việt Nam mơdêk tơbleăng nhên, tơƀrê tơrŭm cheăng Tơnêi têa tung la ngiâ tŭm têk nếo châ mơjiâng pơla péa tơnêi têa.

Ngế pro xiâm phŏ hnê ngăn tơnêi têa pơkâ thế Nhuk séa ngăn tŏng kum ăm Việt Nam mâu kơxô̆ liăn mung ODA nếo ƀă tơdroăng mung ƀă pro hlá mơ-éa kơjo kum, tơ’lêi tâ, mơni kô tiô túa tŏng kum liăn ngân vâ pêi pro mâu tơdroăng tơkêa mơjiâng bro hngêi trăng troăng tung la ki kal tíu pơkâ pêi kân dêi Việt Nam; mơdêk tơbleăng tŏng kum ODA ăm mâu tơdroăng tơkêa tung kơvâ cheăng hơ’lêh kơxô̆, hơ’lêh ngiât, mâu tơdroăng tơkêa pro troăng rơxế lơ treng kơphô̆ a Hà Nội, pơlê kong kân Hồ Chí Minh.