Kơxê hâi lơ 23/3,  Pôa Lê Thành Long, Phŏ ngế pro xiâm hnê ngăn tơnêi têa pêi cheăng ƀă Khu xiâm ngăn hnê hriâm ƀă hnê mơjiâng tuăn ngôa rơkê troh veăng hôp tơpui Pơkâ ‘na xoăng hnoăng dêi mâu kăn kong pơlê tung tơdroăng hnê hriâm tiô tơdroăng tơkŭm mâu kăn kong pơlê péa râ, ƀă tơdroăng cheăng Pơkâ ‘na xoăng râ, xoăng hnoăng pơkuâ tung tơdroăng cheăng rak ngăn tơnêi têa kơvâ hnê hriâm.

A rôh hôp, mâu tơdroăng veăng tối, kơvâ cheăng tối ki mơ-eăm dêi Khu xiâm ngăn hnê hriâm ƀă hnê mơjiâng tuăn ngôa rơkê, cho Khu ki apoăng pơtroh hlá mơ-éa hbrâ chêh tơdroăng Pơkâ ăm Khu xiâm ngăn ‘na Luât vâ séa ngăn mơnhên. Tối mơgêi a rôh hôp, pôa Lê Thành Long Phŏ Ngế pro xiâm hnê ngăn tơnêi têa pơkâ thế khu xiâm ngăn hnê hriâm ƀă hnê mơjiâng tuăn ngôa rơkê séa ngăn, riân nếo tâi tâng mâu tơdroăng cheăng pêi nôkố ƀă tối nhên hnoăng cheăng dêi rêm râ.

Phŏ ngế pro xiâm hnê ngăn tơnêi têa xuân pơkâ thế Khu xiâm ngăn hnê hriâm ƀă hnê mơjiâng tuăn ngôa rơkê kal thế tí tăng ngăn vâ ‘nâi mơdêk tơ’nôm hnoăng pơkuâ rêm râ ăm rêm to cheăm. Ƀă hnoăng cheăng pêi tung kơvâ ki kố, râ cheăm kô pêi hên tâ. Phŏ ngế pro xiâm hnê ngăn tơnêi têa pơkâ thế vâ môi tuăn ƀă mâu tơdroăng ‘na pơtroh hnoăng cheăng tơ’nôm ing Chin phuh, Ngế pro xiâm  hnê ngăn Chin phuh ăm Khu xiâm ngăn hnê hriâm ƀă hnê mơjiâng tuăn ngôa rơkê.