A roh tơdah, péa pâ phiu ro ‘na mâu troăng mơnhông păng ‘nâng dêi tơrŭm cheăng Việt Nam – Kŏng hoa Czëch tung hên kơvâ, tiô tơdroăng ki xiâm loi tơngah kal kí ki kân. Pêi lo liăn tê mơdró pơla péa pâ tâk hôm, châ 2 rơtal dollars hơnăm 2024 ƀă 1,9 rơtal dollars tung 10 khế hơnăm 2025, laga tá hâi tơxâng ƀă tơmeăm ki ai hlâu, ki rơdêi dêi péa tơnêi têa.

Péa pâ ối hên tơnêi ki lôi chúa vâ mơdêk pêi lo liăn tê mơdró, mơdêk mơ’no liăn cheăng ƀă tơrŭm tung hên kơvâ cheăng ki ê. Pôa Lương Cường, Kăn xiâm hnê ngăn tơnêi têa pơkâ thế kơ koan mơjiâng luât péa tơnêi têa pơtối tơrŭm vâ mơjiâng luât tơ’lêi hlâu ăm tơrŭm cheăng pơla péa pâ, tơxâng ki pơxúa tơdjuôm dêi péa tơnêi têa, veăng gum tung hơniâp lĕm, tơniăn, tơrŭm ƀă mơnhông mơdêk a kơpong ƀă lâp plâi tơnêi.