Teăng mâ kăn xiâm Đảng, Tơnêi têa ƀă Kuăn pơlê Việt Nam, Kăn xiâm hnê ngăn tơnêi têa hâk mơnê rơkâu ƀă tối tơdroăng sôk ro ‘na mâu hnoăng hiăng châ pêi pro ki kal, ai pơxúa dêi Đảng, Tơnêi têa ƀă kuăn pơlê Lếo nhŏng o hiăng châ pêi pro tung mâu hơnăm mơnhông tơƀrê 50 hơnăm hdrối.

Tối nhên tơdroăng tơrŭm cheăng ki kal pơla Việt Nam - Lếo; Lếo ƀă Việt Nam hiăng châ mâu kăn xiâm ki rơkê Pôa Hồ Chí Minh -  Kăn xiâm hnê ngăn tơnêi têa, pôa Kaysone Phomvihane - Kăn xiâm hnê ngăn ƀă pôa Souphanouvong - Kăn xiâm hnê ngăn kong têa ki pơkâ xiâm; châ mâu rơxông mâu kăn ƀă kuăn pơlê péa tơnêi têa mơjiâng, rak vế, tơbêng ƀă têa kơxôu kơxâm, ivá, tuăn ngôa ƀă tá kơxêng mơheăm, Kăn xiâm hnê ngăn tơnêi têa tối, mê cho hiăng chiâng tơmeăm khoăng kơnía, cho “Tơrŭm cheăng ki má môi tung rơxông lâp plâi tơnêi; cho tíu ki tơngâh krá kak vâ mâu rơxông hâi kố ƀă xo ah hmôi pơtối rak vế pêi pro mâu tơdroăng hơ’muăn ki lĕm ‘na tơrŭm cheăng ki kân lĕm, ‘na tuăn ‘nâi tơrŭm dêi rơpó ƀă tơrŭm tung tŭm tơdroăng cheăng pơla péa tơnêi têa.