Kuăn pơlê tơring Tiên Phước, kong pơlê Quảng Nam ai tối tiah kố, mâu hơnăm hdrối nah, Đảng ƀă Tơnêi têa malối tơmâng khât mơngế ai hnoăng, laga, hên ngế ai hnoăng kăch măng hâi châ kâ liăn ki mơhá, tơmeăm tŏng kum xua hên tơdroăng ki ê pơrá phá. Luât pơkâ tŏng kum mâu mô đô̆i rong râ, hlâ hía, mâu ngế ai hnoăng, mâu ngế ki tro trếo ‘mêi dioxin ối iâ tâng vâ pơchông ƀă tơdroăng rêh ối pơlê pơla.

Tiô pôa Nguyễn Đức Hải, Kăn xiâm phŏ hnê ngăn Kuô̆k hô̆i kong pơlê Quảng Nam tối, cho kơpong tơnêi kro mơdrŏng tơdroăng kăch măng, cho tíu ki ai hên ngế hlâ xua tơplâ, hên Jâ Nôu Việt Nam khên tơnôu má môi tung lâp tơnêi têa. Xua mê, ôh tá chiâng lôi rơpŏng hngêi mâu ki ai hnoăng ƀă kăch măng ôh tá châ xúa tơdroăng tŏng kum, ôh tá châ kâ liăn ki mơhá ăm.

Kăn xiâm phŏ hnê ngăn Kuô̆k hô̆i pơkâ thế kơvâ ngăn mố đô̆i tro rong ƀă rêh ối pơlê pơla kong pơlê Quảng Nam séa ngăn, pêi hdrối tơdroăng tŏng kum liăn khế  ăm mâu ngế ki ai tŭm tiô tơdroăng pơkâ.